Aleś Kudrycki. Pałachlivyja pieramožcy

Pałachlivyja pieramožcy

Biełaruskija spartoŭcy krychu pabojvajucca kantaktaŭ z aŭstralijskaj biełaruskaj dyjasparaj

U Aŭstralii pabolšała biełarusaŭ. Časova, viadoma. Aficyjnaja presa daje ŭjaŭleńnie pra toje, jak składajucca adnosiny biełaruskaj delehacyi z pradstaŭnikami inšych delehacyjaŭ, mytnikami, absłuhaj Alimpijskaj vioski i navat ź miascovymi kienhuru. A što nakont dačynieńniaŭ z tamtejšymi biełarusami?

Viačasłaŭ Jelkanovič, kiraŭnik Biełaruskaje słužby Aŭstralijskaha radyjo, kaža, što paśpieŭ užo sustrecca ź niekalkimi našymi spartoŭcami dy adnym z treneraŭ. U jaho skłałasia ŭražańnie, što tyja nia vielmi achvočyja da razmovaŭ, aściarožničajuć, krychu pabojvajucca. Niebiaśpiečna, vidać, “zaśviacicca” dzie-niebudź u niezaležnaj hazecie. Spartoviec, kažuć, zaležyć ad čynoŭnika nia mienš, čym ad siły svaich ciahlicaŭ. Zrobiš pamyłkovy krok, možaš pazbavicca nia tolki tannaj kvatery ŭ mienskim alimpijskim kompleksie, ale j pucioŭki na nastupnuju Alimpijadu. Aficyjnyja asoby paźbiahajuć kantaktaŭ z dyjasparaj. Zrešty, hetaha ad ich nichto nie patrabuje – aŭstralijskija biełarusy vyrašyli nia mieć nijakich aficyjnych sustrečaŭ z čynoŭnikami ad biełaruskaha NAK u znak pratestu suprać palityki taho, chto hety kamitet uznačalvaje. A voś da spartoŭcaŭ staŭleńnie cudoŭnaje, usie im zyčać pieramohi.

Što da akcyjaŭ pratestu, dyk ich paprostu nia budzie. Mała ad ich karyści, vyrašyli aŭstralijskija biełarusy.

A voś aŭstralijskija abaryhieny vyrašyli sabrać mitynh. Jany ličać, što aŭstralijskija ŭłady karystajucca Alimpijadaj, kab pachavać pamiać pra niekalki stahodździaŭ hvałtu i zabojstvaŭ, jakija pačalisia ŭ 1788 hodzie paśla prybyćcia pieršych biełych pasialencaŭ.

Aŭstralijskija ŭłady darma bajalisia, što mahutnyja pratesty mohuć papsavać cyrymoniju adkryćcia. Demanstracyja atrymałasia nia vielmi ŭražalnaja. Kala dźviuch sotniaŭ abaryhienaŭ dy ich biełych prychilnikaŭ ź plakatami “Soram, soram Aŭstralii” prajšlisia pa Sydnei dy cicha padalisia kožny pa svaich spravach.

Abaryhienaŭ u Aŭstralii zastałosia niašmat – kala 400 tysiačaŭ, prykładna 2,1% 19-miljonnaha nasielnictva krainy-kantynentu. I ŭsio-tki alimpijski ahoń zapaliła sapraŭdnaja abaryhienka – atletka Keci Frymen, čempijonka śvietu ŭ biehu na 400 metraŭ. Šeść hadoŭ tamu na spabornictvach u Kanadzie jana praniesła abaryhienski ściah, robiačy finalny pieramožny kruh pa stadyjonie. Šyški vialikaha sportu byli vielmi niezadavolenyja. Vidać, Keci Frymen, jakaja nie zbajałasia tady krytyki biełych rasistaŭ, možna nazvać pieršaj ź pieramožcaŭ Alimpijady-2000. Pažadajem taho ž i našym spartoŭcam.

Aleś Kudrycki