Kryścina Pučynskaja. Puškin — dzieciam

Puškin — dzieciam

Aleś Puškin razmalavaŭ biełaruski dziciačy sadok

Najnoŭšy tvor mastaka Alesia Puškina pryśviečany vychavancam biełaruskaj hrupy dziciačaha sadka №314 (što ŭ dvarach za kniharniaj “Maładość”, na vuł.Bahdanoviča).

U piatnicu 22 vieraśnia dzietki adznačyli svajo pieršaje śviata — adkryćcio hrupki. Ź vinšavańniami pryjšli nia tolki ichnyja ž baćki (siarod jakich šmat viadomych i pavažanych u Biełarusi ludziej), ale j patencyjnaja źmiena (mienšyja biełaruskamoŭnyja dzieci), žurnalisty, bratčyki Pravasłaŭnaha bractva biełaruskaj moładzi imia Kastusia Astroskaha, a taksama šaściklaśniki z 89 škoły Miensku, jakija vučacca pa prahramie “Etnaškoła”. Darečy, bractvu pravasłaŭnaj moładzi vychavacieli hrupki zaŭdziačvajuć ramont sadka i padrychtoŭku śviata. Asobny dziakuj kažuć jany firmie “Eŭravita”, vytvorcu šakaladu “Teravita”, što padsaładziła dziatvie žyćcio.

Što da Alesia Puškina, dyk na śviacie mastak nia moh strymać zachapleńnia. Heta ž kolki ŭ adnym miescy sabrałasia biełaruskich dzietak! Svoj padarunak jon pradstaviŭ praz dva dni. Pryjšła čarha zachaplacca dzietkam. Na placoŭku biełaruskaj hrupki paciahnulisia delehacyi dzietak i vychavacielaŭ z usiaho sadku.

Čaroŭny pendzal mastaka pieratvaryŭ zvyrodlivy cahlany haraž u kazačny horad ź viežami j zamkami, a na “saŭkovuju” kaflanuju altanku pasialiŭ pryŭkrasnaha rycara. Na deltaplanie rycaraniatka ŭźniałosia nad Biełarusiaj dy kliča pa racyi siabroŭ na dapamohu: nia ŭsio ładzicca ŭ rodnaj dziaržavie. Dy pakul nie źvialisia rycaraniaty, Biełaruś pad nadziejnaj achovaj.

Achvočyja pahladzieć na novyja tvory viadomaha mastaka mohuć zachodzić u hości da biełaruskich daškalataŭ. A kali z saboju vy pryniasiecie jakuju cacku (aproč miakkich) ci knihu (aproč rasiejskich), biełaruskamoŭnyja dzietki skažuć (tyja ź ich, chto ŭžo ŭmieje razmaŭlać) — “vialiki dziakuj”.

Kryścina Pučynskaja