Z usioj krainy
№ 31 (240), 30 lipienia 2001 h.
Z usioj krainy
Łukašenku za 70
Pavodle infarmacyi z krynicaŭ u Administracyi prezydenta, A.Łukašenka stavić zadaču zabiaśpiečyć taki vynik vybaraŭ, pry jakim jon atrymaŭ by nia mienš za 70% hałasoŭ. Dziela hetaha planujecca pryciahnuć usie administracyjnyja i infarmacyjnyja resursy. Nia vyklučanyja taksama dalejšyja manipulacyi ź ličbaj zarehistravanych kandydataŭ. Pra apošniaje ŭskosna śviedčać słovy spn.Jarmošynaj, jakaja zajaviła na Radyjo Racyja, što “vybary adbuducca, navat kali budzie zarehistravany tolki adzin kandydat”.
B.T.
Bunt na BT uźniaŭ prafsajuz
27 lipienia, na Dzień Niezaležnaści, prafbiuro Dyrekcyi perspektyŭnaha viaščańnia 1-ha nacyjanalnaha telekanału, u jakuju ŭvachodziać praktyčna ŭsie tvorčyja supracoŭniki BT, adzinahałosna pryniało adkryty zvarot da novaha kiraŭnika Valerja Skvarcova.
Supracoŭniki skardziacca, što za hety hod adbyłosia razbureńnie tielebačańnia. Z ekranu biespadstaŭna źnikajuć sacyjalna-ekanamičnyja, mastacka-aśvietnickija, moładzievyja j dziciačyja prahramy. Eterny čas BT pieradaje niedziaržaŭnym kampanijam, jakim płocić vializnyja hrošy. Novyja idei supracoŭnikaŭ kraducca. Tak, ideja aŭtarskaj prahramy Ludmiły Mielnikavaj “Čas prafesijanała” ź viedama Čykina była pieradadzienaja blizkaj da jaho asobie.
Televizyjščyki vykazvajuć niedavier namieśniku Skvarcova Rybakovu, hienpradjuseru Chrustalovu j hiendyrektaru BT Damarackamu, prapanujuć demakratyčna abrać mastackuju radu i pravieryć finansavyja adnosiny kiraŭnictva ź niedziaržaŭnymi kampanijami.
Arciom Łukjanovič
Biełaruś skupiła ŭsio rasiejskaje zołata
Za pieršuju pałovu hodu vałavy ŭnutrany pradukt Biełarusi vyras na 3%, ekspart — na 6,2%, vytvorčaść sielhaspradukcyi — na 6,9%, hrašovyja dachody nasielnictva — na 21%. Adnak mienšaj, čym spadziavalisia, vyjaviłasia vytvorčaść pramysłovaj pradukcyi i spažyvieckich tavaraŭ, a pakaźniki budaŭnictva, zamiežnaha handlu i abnaŭleńnia asnoŭnych fondaŭ uvohule źnizilisia. Nie dabrali i 1% srodkaŭ u ahulny biudžet. Asabliva ciažka ź pieraličeńniami ŭ respublikanski biudžet (97,2% ad planu), a taksama ŭ rehijanalnyja biudžety Viciebščyny (98,3%) dy Mahileŭščyny (92,1%). Najbolšyja zapazyčanaści, jak śćviardžaje padatkavy kamitet, u Mienskaha traktarnaha, Mienskaha matornaha, Klimavickaha likiora-harełačnaha zavodaŭ i Babrujskaha zavodu traktarnych ahrehataŭ.
Maskoŭskaja presa piša, što Nacbank Biełarusi zaprapanavaŭ vyšejšuju, u paraŭnańni z rasiejskim Centrabankam, canu za kaštoŭnyja metały i ŭ vyniku atrymaŭ 96,5% usiaho zołata, zdabytaha letaś u Rasiei. Ciapier Centrabank vinavacić Biełaruś u spekulacyjnych aperacyjach. Aficyjnaha adkazu biełaruskaha Nacbanku pakul niama.
A biełaruski mały i siaredni biznes atrymaje palohku. Mała taho, što apošni termin pierarehistracyi subjektaŭ haspadarańnia pieraniesieny na nastupnaje leta, dyk jašče, nibyta, i lhotnyja padatki na prybytak dla pradprymalnikaŭ uviaduć: u pieršy hod — na 50% mienšyja, u druhi — na 40%, treci — 30%, čaćvierty — 20% i, narešcie, piaty hod — na 10%.
Da 1 listapada 2002 h. skončycca rekanstrukcyja Mienskaj kalcavoj darohi. Jana budzie mieć 6 pałosaŭ, admysłovyja padziamielnyja pierachody dla piešachodaŭ i zastaniecca ŭvohule bieź śvietłaforaŭ. Ciapier urad i Mienharvykankam terminova šukajuć hrošy, kab užo sioleta pakłaści 320 tysiač tonaŭ asfaltu na 28 km trasy.
Siaržuk Ivanoŭski
Pleščanka za bajkot
“Cviadomamu biełarusu 9 vieraśnia hałasavać niama za kaho!” — zajaviŭ staršynia viciebskaj supołki partyi chryścijanskich kanservataraŭ Uładzimier Pleščanka ŭ svaim zvarocie da žycharoŭ Viciebsku. Pleščanka kaža, što Hančaryk — namenklaturny kandydat, jakoha padtrymlivaje Rasieja, i śviadomamu biełarusu brać udzieł u namenklaturnaj mituśni nia varta. “Siońnia ŭ nas niama inšaha vybaru, akramia jak nie pryznać hetych vybaraŭ... Nie — vybaram z udziełam Łukašenki!” — havorycca ŭ zvarocie.
Pavodle BiełaPAN