Naša vojska ŭ kamizelkach

pieraabmundziravańnie

Naša vojska ŭ kamizelkach

Sioleta šerah padraździaleńniaŭ biełaruskaha vojska atrymaŭ novuju formu. Čynoŭniki ź Minabarony kažuć, što praz try hady jaje apranuć usie vajskoŭcy.

Ministar abarony hienerał-pałkoŭnik Leanid Malcaŭ planuje skončyć refarmavańnie biełaruskaha vojska ŭ 2005 h. Da taho času Ŭzbrojenyja Siły krainy skarociacca z 80 tys. vajskoŭcaŭ i 20 tys. cyvilnych słužboŭcaŭ da 50 i 15 tys. adpaviedna. Adnym ź pieršych krokaŭ reformy stałasia raspracoŭka abmundziravańnia novaha ŭzoru.

Jano budzie roźnicca ad staroha inšym malunkam kamuflažu, raźmieščanym upopierak (raniej jon raźmiaščaŭsia ŭzdoŭž). U rečavaj słužbie tyłu Ŭzbrojenych Siłaŭ, jakaja zajmałasia raspracoŭkaj abmundziravańnia, kažuć, što jano zroblenaje z bolš jakasnaj tkaniny — nia budzie hetak vyharać i vyciahvacca.

Aproč taho, u kožnaha vajskoŭca budzie “razhruzačnaja kamizelka”, kštałtu tych, jakija majuć desantniki. U jaje kišeni možna budzie kłaści medykamenty, mahazyny z patronami, hranaty, charčy, radyjostancyju — usio, što raniej mieściłasia ŭ sumkach. Kamizelki dla aŭtamatčykaŭ, snajperaŭ i kulamiotčykaŭ buduć roźnicca. Pa desantnym varyjancie zrobleny i rečavy miech, u jakim, siarod inšaha, musić być spartovy kaścium, źmiena abutku i h.d. Aficery atrymajuć indyvidualnyja radyjostancyi dy kalimatornyja łazernyja pryceły.

Pieršymi formu novaha ŭzoru atrymali žaŭniery i aficery najbolš bajazdolnych čaściej. Tak, sioleta ŭviesnu jaje apranuła 1-ja motastrałkovaja rota 11-j hvardziejskaj asobnaj mechanizavanaj bryhady, što staić u Słonimie. Leanid Malcaŭ u krasaviku asabista ahledzieŭ hetuju rotu i byŭ zadavoleny vyhladam bajcoŭ u novym abmundziravańni. A ŭ časie sumiesnych rasiejska-biełaruskich vučeńniaŭ na Harachavieckim palihonie pad Maskvoj słonimskaja rota ŭraziła rasiejcaŭ svajoj amal “NATOŭskaj” formaj.

Aleh Tačony