Naviny

Naviny

Sport na słužbie palityki

Spartoŭcy z Ukrainy, Biełarusi, Estonii, Litvy i Łatvii pajeduć u Maskvu na hulni krain SND i Bałtyi, što prachodziać 14—15 červienia, choć kanservatyŭnyja partyi hetych krain zaklikajuć da bajkotu spabornictvaŭ. Litoŭcy, naprykład, hetymi dniami jakraz adznačajuć hadavinu pačatku savieckaj akupacyi i masavych vysyłak u Sibir. Kanservatary ŭ krainach zachadu byłoha SSSR pierakananyja, što hulni — heta palityčnaja manipulacyja, pry dapamozie jakoj Rasieja choča prademanstravać, što byłyja savieckija respubliki nia vyjšli ź jaje sfery ŭpłyvu.

Hamaki dla małpaŭ

Druhi tydzień u Kalininhradzkim zaaparku pracujuć zaolahi ź Vialikaj Brytanii Li Batler i Džulijan Bafery. Jany palapšajuć umovy žyćcia tamtejšych małpaŭ. Prymatam patrebnyja vielizarnyja valjery, tady jak kalininhradzkija hibony dy šympanze siadziać u ciesnych kletkach. A kiepskija žyllovyja ŭmovy adbivajucca nia tolki na zdaroŭi, ale j na charaktary žycharoŭ zaaparku. Dziakujučy anhielskim zaolaham, u kletkach kalininhradzkich małpaŭ užo źjavilisia šykoŭnyja hamaki.

Michaś Vasilevič

Etničnaja čystka ŭ Jemenie

Urad Jemenu va ŭmovach poŭnaj sakretnaści departavaŭ ŭ Izrail blizu 300 jemenskich habrejejaŭ. Jon źbirajecca vysłać z krainy ŭsich habrejaŭ da adnaho. Jak śćviardžajecca, havorka jdzie nie ab hvałtoŭnaj departacyi, a ab “tajemnym pahadnieńni pamiž uradami Izrailu i Jemenu”.

Pamior “chrosny baćka” ZŠA

Džon Hoci, hałava najbolšaha ŭ ZŠA mafijoznaha kłanu Hambina, pamior u paniadziełak u turmie štatu Misury ad raku horła. Jahony kłan naličvaŭ 300 “aŭtarytetaŭ” i 3 tysiačy šarahovych zładziejaŭ, jakija, siarod inšaha, kantralavali ŭ Ńju-Jorku vyvaz śmiećcia, nielehalny tatalizatar, prastytucyju i bolšuju častku tenderaŭ na dziaržaŭnyja padrady. Hoci siabravaŭ z žurnalistami i lubiŭ, kali jaho paraŭnoŭvali z Al Kapone. Šmat hod jon unikaŭ turmy, padkuplajučy prysiažnych i zabivajučy śviedak. Tolki ŭ 1991 h. FBR zdoleła zasadzić jaho za kraty z dapamohaj sučasnych technalohij padsłuchoŭvańnia. Reštu žyćcia jon prasiadzieŭ u padziemnaj kamery biaz voknaŭ.

B.T.