Bitva kantynentaŭ

pa-za hulnioj

Bitva kantynentaŭ

U čverćfinałach mundyjalu čatyrom eŭrapiejskim zbornym procistajać kamandy z Paŭdniovaj i Paŭnočnaj Ameryki, Afryki j Azii. Tak vysoka azijaty padymalisia na čempijanatach śvietu ŭsiaho raz — u 1966-m. Tady, pierahulaŭšy ŭ vyrašalnym hrupavym matčy italjancaŭ, da čverćfinału dajšli futbalisty Paŭnočnaj Karei. Ich paŭdniovyja surodzičy złavili kuraž sioleta — achviarami znoŭ italjancy. U aŭtorak u Tedžonie znanyja majstry hulniaŭ “na vylet”, trochrazovyja čempijony śvietu ledź nia ceły matč spraŭna studzili ruchavych karejcaŭ i marnavali pry hetym šancy na druhi hoł. Za try chviliny da pieramohi italjanskaja barykada schibiła. Hulnia pierajšła ŭ overtajm, i tam daminacyja haspadaroŭ abiarnułasia załatym hołam. Tryjumfujučy, ale nia traciačy apetytu, karejcy rychtujucca ciapier da subotniaha boju z Hišpanijaj. Dla nastaŭnika haspadaroŭ halandca Chidynka hišpanski futboł nie navina: pry kancy 1990-ch jon patreneravaŭ “Reał”, a paśla “Betys”. Chidynka ŭ Paŭdniovaj Karei bahomiać: mieracca pastavić jamu pomnik u adnym ź miestaŭ krainy, a taksama dać hanarovaje hramadzianstva.

Tym časam dla druhich haspadaroŭ pieršynstva — japoncaŭ — matč 1/8 finału akazaŭsia apošnim. Kamandu francuza Filipa Truśsie pierahulali mudrejšyja turki. Zrešty, ad toj aryhinalnaj, ahresiŭnaj i dynamičnaj zbornaj Japonii, jakuju bačyli ŭ sustrečach hrupavoha etapu, hetym razam śladoŭ było mała. Im nia prosta nie chapiła ambicyjaŭ — im nie dali zhulać supierniki. Turki, druhi raz u historyi bieručy ŭdzieł u finalnym turniry čempijanatu śvietu, iduć dalej i klanucca vyjści ŭ finał. Ź siaredziny 90-ch hetaja pryhožaja kamanda praryvajecca ŭ futbolnuju elitu. Sioleta ŭ tureckich futbalistaŭ kalasalnaja finansavaja matyvacyja — nieabmiežavany pamier premijalnych za vychad u finał. Pakul ža ŭ subotnim čverćfinale plany turkaŭ budzie razburać sensacyjny navičok mundyjalu, vice-čempijon Afryki zbornaja Senehału. Paśla pieramohi nad dužymi švedami senehalcy majuć šaniec pieršymi z afrykancaŭ prarvacca ŭ paŭfinał čempijanatu. Darečy, ich trener Bruno Metsiu staŭ pieršym francuzam, jaki zdoleŭ davieści zamiežnuju zbornuju da čverćfinału suśvietnaha pieršynstva.

Praryŭ u elitu ŭčyniła jašče adna kamanda na mundyjali — amerykanskaja. Jaje starańniami ŭžo treci raz zapar prypyniłasia na 1/8 finału zbornaja Meksyki. Amerykancy metadyčna pieraškadžali meksykancam hulać, a pry hetym zdoleli jašče j zabić dva miačy. U piatnicu ŭ karejskim Ulsanie zbornaja ZŠA budzie procistajać niemcam. Favarytami ŭ hetaj pary — eŭrapiejcy. Favaryty pabojvajucca: Oliver Kan, niamiecki bramnik i kapitan, nazvaŭ amerykancaŭ vielmi niepryjemnym supiernikam. Analahičnaje dumki pra zbornuju Niamieččyny i amerykancy, pierad jakimi staić perspektyva paŭtaryć dasiahnieńnie 72-hadovaj daŭniny — vychad kamandy ZŠA ŭ paŭfinał pieršaha čempijanatu śvietu pa futbole.

Pačynajecca stadyja čverćfinałaŭ u japonskim Fukuroi matčam Brazylii j Anhlii. Brazylcy vyjhrali dasiul na čempijanacie ŭsie svaje čatyry matčy. Apošni — krychu na klasie, krychu na losie ŭ hodnych pašanavańnia, abdzielenych sudździom belhijcaŭ. Z mabilnymi, čujnymi na čužyja pamyłki anhielcami brazylcam budzie našmat ciažej. “One Dane, three to go” (“adzin zrobleny, try prajści”), — hulała słovami paśla pieramohi zbornaj Anhlii ŭ 1/8 finału nad datčanami brytanskaja presa. Kozyram suajčyńnikaŭ u matčy z brazylcami jana ličyć lepšuju arhanizacyju hulni. Što procipastaviać brytanskamu paradku brazylcy?

Juraś Bušlakoŭ