Uradžaj zła

Uradžaj zła

Złačynnaść za paŭhodu vyrasła na 13%

U krainie raźvivajecca kapitalizm, a razam ź im raście złačynnaść.

Za pieršuju pałovu 2002 h. u Biełarusi zarehistravana 64,6 tys. złačynstvaŭ — heta amal na 13% bolej, čym za adpaviedny peryjad letaś. Pra heta paviedamiŭ pieršy namieśnik ministra ŭnutranych spravaŭ — načalnik kryminalnaj milicyi Barys Tarlecki. Takim čynam, za hod tolki zarehistravanyja złačynstvy buduć ździejśnienyja suprać kožnaj dvaccać piataj siamji. Adsiul — pačućcio niebiaśpieki, ź jakim žyvie bolšaść biełaruskich siemjaŭ.

Ekanamičnych złačynstvaŭ było amal 11 tysiač, ź ich 791 vypadak chabarnictva. Rezka vyrasła ličba złačynstvaŭ, źviazanych z narkotykami, — 2,7 tys. faktaŭ, na 61% bolš, čym letaś. Skanfiskavana 600 kh narkatyčnych srodkaŭ, syraviny i psychatropnych rečyvaŭ. Ź niezakonnym abaračeńniem zbroi byli źviazanyja 275 złačynstvaŭ.

Źmienšyłasia tolki kolkaść kvaternych kradziažoŭ i ŭhonaŭ aŭtamašyn. Paboleła zabojstvaŭ i rabunkaŭ. Rekordna vyrasła kolkaść złačynstvaŭ, źviazanych z seksualnaj ekspluatacyjaj žančynaŭ — na 231%.

Siarod pryčynaŭ rostu złačynnaści B.Tarlecki nazvaŭ pjanstva, biespracoŭje (55% pryciahnienych da kryminalnaj adkaznaści ludziej nidzie nie pracujuć), a taksama nizkuju zakonapasłuchmianaść hramadzianaŭ. Usie hetyja faktary zaležać pieradusim ad ahulnaje sytuacyi ŭ krainie, palityčnaha kursu, a nie ad pracy milicyi.

Pavodle infarmacyi B. Tarleckaha, za pieršaje paŭhodździe złačynstvy ŭčyniali 29,5 tys. čałaviek. 10% ź ich — niapoŭnahadovyja, 13% — žančyny, 32% — raniej sudzimyja. 28% złačyncaŭ u čas ździajśńnia lichich spravaŭ byli napadpitku.

Istotna vyrasła recydyŭnaja złačynnaść. Vierahodnaja pryčyna hetaha — vialikaja kolkaść amnistyjaŭ u apošnija hady, patrebu jakich dyktavała pierahružanaść turmaŭ. Złačynnaść va ŭschodnich abłaściach Biełarusi amal u dva razy vyšejšaja, čym u zachodnich. Raskryvalnaść złačynstvaŭ składaje ŭsiaho kala 60%.

Va ŭsich krainach Uschodniaj Eŭropy najbolšy rost złačynnaści prypadaŭ na hady burnaha raźvićcia novych vytvorčych adnosinaŭ u haspadarcy. Pa miery stabilizacyi rynkavaj ekanomiki mienšała i złačynstvaŭ. Biełaruś taksama hublaje sacyjalnuju stabilnaść. Ale zamiest reformaŭ my majem dziki kapitalizm, prava mocnaha i adsutnaść perspektyvaŭ dla moładzi. U takich uschodniebiełaruskich haradach, jak Barysaŭ ci Vorša, užo žyviecca, niby na Sycylii. Kali tak budzie praciahvacca, chutka stanie, jak u Sibiry, dzie na leciščy niemahčyma pakinuć navat rydloŭku: kraduć usio, a nie šukaje nichto.

Rost złačynnaści na 13% u hod — źjava vyklučnaja. Jana lepš za što inšaje śviedčyć: u krainie niama dabra. Možna abviaścić dekadu pa baraćbie sa złačynnaściu, abaviazaŭšy milicyjantaŭ i śledčych spać pa čatyry hadziny, jak ciapier kambajnioraŭ. Možna “padkrucić” statystyku. Dy tolki takimi mierami złačynnaści nia vyniščyš, jak i ŭradžaju nie źbiareš biaz strataŭ.

Mikoła Buhaj;
inf. BiełaPAN