Bitva za ŭłasnaść FPB

Bitva za ŭłasnaść FPB

Źjezd prafsajuzaŭ prachodzić pad lozunham
zmahańnia z karupcyjaj u arhanizacyi

18—19 vieraśnia ŭ Miensku prajšoŭ čaćviorty źjezd Federacyi prafsajuzaŭ Biełaruskaj. Hety forum musiŭ zaćvierdzić staršyniu FPB, vyznačyć kirunki raźvićcia abjadnańnia na 2002—2005 h. Adnak hałoŭnaj intryhaj zastajecca baraćba za prafsajuznuju ŭłasnaść, razhornutaja Leanidam Kozikam. Kankretnym jaje ŭvasableńniem na źjeździe staŭsia “antykarupcyjny” dakład Revizijnaje kamisii FPB dy prysutnaść pradstaŭnikoŭ prakuratury.

Novy staršynia pačaŭ svaju dziejnaść z kadravych źmienaŭ. U adstaŭku najpierš pajšli prafsajuznyja čynoŭniki, što mieli spravu z ułasnaściu. Ździsłava Zajkoŭskaha na pasadzie staršyni “Dyrekcyi pa kiravańni ŭłasnaściu FPB” zamianiŭ vychadziec z Mahiloŭščyny Valery Višnieŭski. Vykinuty z FPB j Anatol Sadoŭski, načalnik haspadarčaha ŭpraŭleńnia UP “Dom prafsajuzaŭ”, jakoje zajmałasia materyjalna-techničnym zabieśpiačeńniem i absłuhoŭvańniem FPB. Jaho źvinavacili ŭ złoŭžyvańni słužbovym stanoviščam: čynoŭnik, śćviardžajuć u Federacyi, uładkavaŭ na pracu dačku, jakaja pracavać nie źjaŭlałasia, a zarobki atrymlivała. Paśla taho jak A.Sadoŭski viarnuŭ u kaznu “zaroblenyja” takim čynam paŭtary tysiačy dalaraŭ, ź im cichaj sapaj raźvitalisia.

Ź vieraśnia pačałasia aktyŭnaja prapahandysckaja kampanija suprać raniejšaha kiraŭnictva FPB, jakoje, nibyta, złoŭžyvajučy słužbovym stanoviščam, niezakonna pradavała ci zdavała ŭ arendu ŭłasnaść prafsajuzaŭ. Tak, 10 vieraśnia na sustrečy z delehatami ad Mahiloŭskaj, Mienskaj abłaściej i Miensku adkrylisia “novyja fakty niezakonnaha prodažu i zdačy ŭ arendu prafsajuznaj ułasnaści pryvatnym asobam z pramoj škodaj dla prafsajuzaŭ. Padymajecca pytańnie pra kalektyŭnuju adkaznaść Prezydyjumu Rady FPB za dapuščanyja parušeńni i złoŭžyvańni”, — havorycca ŭ aficyjnym paviedamleńni presavaj słužby FPB.

Jakija ž fakty paćviardžajuć “karumpavanaść” raniejšaha kiraŭnictva FPB? Najpierš — prodaž prafsajuznaha banku “Prafbank”. Zasnavalnikami jaho byli 52 prafarhanizacyi, adnak ciapier prafsajuzy majuć tolki 2% akcyjaŭ. U Kaladzičach była niekali pramysłovaja baza, jakuju pradali za miljon dalaraŭ, a kudy pajšli hrošy — nieviadoma. Nia skončany j lahier kala Radaškavič, dzie mierkavałasia azdaraŭlać 500 čarnobylskich dziaciej. Jahonyja zbudavańni, pavodle infarmacyi BT, užo ni na što nia vartyja. Jašče śćviardžajecca, što były staršynia Ŭładzimier Hančaryk pieradaŭ pradstaŭnictvu Ŭsieahulnaj kanfederacyi prafsajuzaŭ za košt niavypłačanych unioskaŭ 180 kv.m. hatelu “Arbita” — daččynaha pradpryjemstva FPB.

A paśla, kali ŭznačaliŭ toje pradstaŭnictva, nibyta zdavaŭ tyja metry anhielskaj firmie, atrymlivajučy niemały prybytak. Były kandydat u prezydenty paćvierdziŭ fakt: “Heta była absalutna zakonnaja pieradača. My nie mahli płacić unioski, tamu i pieradali pamiaškańni — heta narmalna”. “Ciažka skazać, nakolki heta narmalna — addavać biełaruskuju ŭłasnaść za tak, u lik pahašeńnia niejkich uznosaŭ, — kazaŭ kamentatar BT 16 vieraśnia. — Niaŭžo siabroŭstva va Ŭsieahulnaj kanfederacyi prafsajuzaŭ było žyćciova nieabchodnaje biełaruskim prafsajuzam? Ci, moža, niechta prosta sprabavaŭ padrychtavać dla siabie zapasnuju namenklaturnuju pasadu?”

Kamień kinuty vidavočna ŭ Hančaryka. Taksama, jak i abvinavačańnie, što jon pradaŭ synu kramu na vulicy Mielnikajte pa 20 dalaraŭ za kv.m., choć nasamreč metar kaštuje tam nia mienš za 300 dalaraŭ.

FPB pracuje na zakryćcio mienskaha pradstaŭnictva UKP pa Biełarusi, Ukrainie i Małdovie “iak nadumanaj i biaździejnaj struktury”. Hetuju inicyjatyvu ŭpieršyniu ahučyŭ Leanid Kozik na źjeździe Federacyi niezaležnych prafsajuzaŭ Rasiei ŭ Maskvie 12 vieraśnia.

Abviarhaje Hančaryk i infarmacyju, što ŭ jahonuju bytnaść staršyniom FPB pradadzieny “Prafbank”: “Nijakaha prodažu nie było. Była elementarnaja padpiska. Nacbank sprabavaŭ adklikać licenziju (tady treba było 2 młn. ekiu statutnaha fondu), my dahaniali patrebnuju sumu. Kali prafsajuzy vydychlisia, daviałosia rabić padpisku na akcyi. Chto ŭdzielničaŭ u padpiscy, toj i atrymaŭ kantrolny pakiet”.

Vidavočna, što “antykarupcyjny” skandał u FPB budzie mieć praciah. Nakolki surjozny dakład Revizijnaj kamisii — stanie vidać paśla źjezdu, pa reakcyi prakuratury.

Va ŭłasnaści FPB na siońnia znachodzicca 17 sanatoryjaŭ, pansijanataŭ dy damoŭ adpačynku, 18 turbazaŭ i hatelaŭ, 3 pałacy kultury, Mižnarodny instytut pracoŭnych i sacyjalnych adnosinaŭ i jaho filii ŭ Homieli dy Viciebsku, dva navučalnyja centry, šerah spartovych, vytvorčych arhanizacyjaŭ. Ahulny košt prafsajuznaj ułasnaści aceńvajecca ŭ 103 młrd. rubloŭ. U rasparadžeńni rehijanalnych strukturaŭ FPB majecca jašče bolš jak na 8 młrd. rubloŭ asnoŭnych srodkaŭ.

Federacyja atrymlivaje niebłahija prybytki. Razhledzim heta na prykładzie “Biełarusturystu” — jejnaje ŭłasnaści. HEUP “Biełarusturyst” abjadnoŭvaje 22 daččynyja pradpryjemstvy: 9 haścinicaŭ i 9 azdaraŭlenčych kompleksaŭ, 9 restaranaŭ na 2155 miescaŭ, 32 biuro padarožžaŭ i ekskursijaŭ, 6 aŭtapradpryjemstvaŭ. U 2001 h. balansavy košt jahonych asnoŭnych fondaŭ skłaŭ 59,4 młrd., reštkavy — 36,8 młrd. rubloŭ. Uviedziena novych asnoŭnych fondaŭ na sumu 1,5 młrd. rubloŭ, vykanana na 1,1 młrd. rubloŭ budaŭničych pracaŭ. UP “Mienskturyst” absłuhoŭvaje da 200 tysiačaŭ ekskursantaŭ za hod.

Hleb Chmialnicki