Łyžka dziohciu na sustrečy z Džeksanam
U Centry IBB 2 śniežnia vystupaŭ prezydent amerykanskaha kamitetu pa NATO palitolah Brus Džeksan.
I nieviadoma čamu ŭsia naša palityčna-žurnalisckaja tusoŭka ad sp.Trusava da sp.Sańnikava zadavała jamu pytańni pa-rasiejsku. Ad čaho heta? Ad niaŭpeŭnienaści ŭ darečnaści svajho pytańnia abo niaŭpeŭnienaści ŭ palityčnaj karektnaści amerykanskaha pasolstva? Bo sp.Džeksan nie davaŭ nijakich nahodaŭ ličyć, što jon razumieje pa-rasiejsku.
Pavažanyja pany, śviadoma ci nie, pryniali praviły hulni niekatorych kalapalityčnych “tusoŭščykaŭ” dy pahadzilisia z tezaju ab tym, što biełaruskaja mova – dla sobskaha ŭžytku, što joj nia varta havaryć z zamiežnikami, bo heta stvaraje prablemy dla pierakładčyka. Niaŭžo vy, panovie, stavicie pad sumnieŭ kvalifikacyju pierakładčyka ambasady samaj mahutnaj u śviecie krainy, jakaja zaŭsiody była paśladoŭnaj prychilnicaj biełaruskich demakratyčnych siłaŭ? Ci słohan “Razmaŭlaj sa mnoj pa-biełarusku” ŭžo bolš nie aktualny? Ci jon – tolki dla ŭnutranaha ŭžytku?
Aleś Łahviniec, Miensk