U Biełaruś pastupiŭ čarhovy tranš kredytu Antykryzisnaha fondu JeŭrAzES

«Srodki piataha tranšu AKF JeŭrAzES u sumie $440 miljonaŭ pastupili i zaličanyja na rachunak Ministerstva finansaŭ u Nacyjanalnym banku», — paviedamiŭ BiełaPAN pradstaŭnik Nacbanka.

Pieramovy biełaruskich uład ab vydzialeńni piataha tranšu kredytu vialisia z pradstaŭnikami AKF JeŭrAzES niekalki miesiacaŭ. Byŭ padrychtavany list Minfina i Nacbanka ab namierach adnosna vydzialeńnia šostaha tranšu. List ustanaŭlivaje paramietry stabilizacyi na 2013 hod.

Jašče ŭ kancy lutaha Siarhiej Šatałaŭ — namieśnik staršyni Jeŭrazijskaha banka raźvićcia, jaki kiruje srodkami JeŭrAzES, zajaviŭ, što Biełaruś atrymaje ŭ chutkim časie piaty tranš kredytu.

27 sakavika ministr finansaŭ Andrej Charkaviec zajaviŭ žurnalistam, što va ŭradzie čakajuć pieraličeńnia čarhovaha tranšu Biełarusi ŭ krasaviku. Pry hetym Charkaviec raskrytykavaŭ AKF u suviazi ź nievykanańniem im raniej zapłanavanych terminaŭ vydzialeńnia biełaruskamu boku tranšaŭ stabilizacyjnaha kredytu. «Nas nie zadavalniaje pracedura pryniaćcia rašeńniaŭ samim Antykryzisnym fondam, jakaja vielmi praciahłaja i jakaja nie karelujecca z abaviazacielstvami, uziatymi fondam u miežach matrycy mier, u pryvatnaści pa terminach», — zajaviŭ kiraŭnik Minfina.

Biełaruś, dadaŭ Charkaviec, časta krytykujuć za toje, jak jana vykonvaje abaviazacielstvy pierad AKF JeŭrAzES, adnak nichto nie abmiarkoŭvaje, jak jon vykonvaje svaje abaviazacielstvy pa terminach.

Kiraŭnik Nacbanka Nadzieja Jermakova ŭ hutarcy z žurnalistami 2 krasavika taksama nie vyklučyła, što Biełaruś moža atrymać piaty tranš kredytu AKF JeŭrAzES da kanca miesiaca. «Jość nadzieja, ćviarozy sens pavinien pieramahčy. Kali nie siońnia, to zaŭtra», — skazała jana.

Razam z tym Jermakova paviedamiła, što na pasiadžeńni ekśpiertnaha savieta Antykryzisnaha fondu JeŭrAzES 1 krasavika kankretnych rašeńniaŭ nakont hetaha pryniata nie było. Pavodle słoŭ Jermakovaj, biełaruski bok nie zhodny z toj pazicyjaj, jakaja vykazvałasia na pasiadžeńni savieta. Na ŭdakładniajučaje pytańnie BiełaPAN, što heta za pazicyja, kiraŭnik Nacbanka adkazała: «Nie budziem vykazvacca zahadzia. Dačakajemsia rašeńnia».

Tym časam 30 sakavika JEABR, jaki kiruje srodkami AKF JeŭrAzES, apublikavaŭ ahlad, u jakim ukazaŭ na ryzyki biełaruskaj ekanomiki. «Klučavoj zadačaj, što staić pierad biełaruskimi ŭładami, źjaŭlajecca adnaŭleńnie ŭstojlivaści płaciežnaha bałansu ekanomiki krainy», — miarkujuć u JEABR.

Pahadnieńnie ab vydzialeńni Biełarusi kredytu z AKF u pamiery 3 młrd. dołaraŭ šaściu tranšami ŭ 2011—2013 hadach było padpisana ŭ červieni 2011 hoda. Pieršy tranš u 800 młn. dołaraŭ byŭ pieraličany ŭ červieni 2011 hoda, jašče 440 młn. — u śniežni 2011-ha.

31 studzienia hetaha hoda Biełaruś atrymała ŭžo čaćviorty tranš u pamiery 440 młn. dołaraŭ. Da kanca hetaha hoda ŭ Minsk pavinien być pieraličany jašče adzin, šosty pa liku, tranš na 440 młn. dołaraŭ.

• 0
• 0
• 0
• 0
• 0
• 0
• 0
• 0