Samy vialiki prybytak za 2013 hod zadekłaravaŭ žychar Minska, paviedamiŭ načalnik hałoŭnaha ŭpraŭleńnia padatkaabkładańnia fizičnych asob Ministerstva pa padatkach i zborach Michaił Rasolka na pres-kanfierencyi 12 červienia ŭ Minsku.
«Najbolšaja suma dachodu zadekłaravana fizičnaj asobaj u Minsku — 59 młrd rubloŭ (dachod, atrymany ad prodažu akcyj za miažoj), suma vyličanaha padachodnaha padatku, z ulikam pradastaŭlenych padatkovych vylikaŭ, skłała 5,1 młrd rubloŭ», — skazaŭ Rasolka.
Jon paviedamiŭ, što pa stanie na 1 maja 2014 hoda 23.526 fizičnych asob pradstavili padatkovyja dekłaracyi ab dachodach.
Kolkaść fizičnych asob, jakija pradstavili padatkovyja dekłaracyi za 2013 hod, źmienšyłasia na 1.773 čałavieki ŭ paraŭnańni z anałahičnym pieryjadam minułaha hoda, abo na 7% (u 2013 hodzie 25.299 fizičnych asob pradstavili padatkovyja dekłaracyi).
Pa słovach pradstaŭnika MPZ, źnižeńnie kolkaści pradstaŭlenych padatkovych dekłaracyj adbyvajecca z 2008 hoda. Heta źviazana z paśladoŭnaj palitykaj pa spraščeńni padatkovaha zakanadaŭstva.
«Heta pierš za ŭsio ŭviadzieńnie ŭ 2009 hodzie adzinaj staŭki padachodnaha padatku ŭ pamiery 12%. U suviazi z hetym adpała nieabchodnaść sukupnaha dekłaravańnia dachodaŭ i značna skaraciłasia kolkaść hramadzian, jakim nieabchodna dekłaravać svaje dachody», — skazaŭ Rasolka.
Pry hetym jon udakładniŭ, što padavać dekłaracyju ab dachodach pa-raniejšamu abaviazany hramadzianie, jakija pradali na praciahu kalandarnaha hoda hruzavy aŭtamabil, aŭtobus, druhuju lehkavuju mašynu, a taksama ŭ vypadku atrymańnia prybytku ad realizacyi kaštoŭnych papier, majomasnych pravoŭ, dolaŭ u arhanizacyjach.
Kamientary