Namieśnik staršyni Partyi BNF Ihar Lalkoŭ daŭ rezka niehatyŭnuju acenku ŭdziełu rasiejskich vajskoŭcaŭ u mienskim paradzie. U kamientary pres-słužbie Partyi BNF jon zajaviŭ:
«Rasiejskija vojski pad rasiejskim trykałoram u Miensku ŭ dzień vyzvaleńnia Biełarusi ad niamiecka-fašysckich zachopnikaŭ – heta ździek z histaryčnaj praŭdy minułaj vajny i niedapuščalnaja padtrymka siońniašniaj rasiejskaj ahresiŭnaj palityki va Ŭkrainie.
Ciapierašni dziaržaŭny ściah Rasiejskaj Fiederacyi – heta simvolika, jakaja vykarystoŭvałasia padčas Druhoj suśvietnaj vajny rasiejskimi nacysckimi farmavańniami na terytoryi Biełarusi, u tym liku hetak zvanymi «ułasaŭcami», «radyjonaŭcami» i «kaminskaŭcami». Prysutnaść jaho na paradzie z nahody hadaviny vyhnańnia ź biełaruskaj stalicy niamiecka-nacysckich zachopnikaŭ jość histaryčna nie abhruntavanaja i pieraŭtvaraje hety parad ŭ fars.
Asabliva niedarečnym i škodnym dla imidžu Biełarusi źjaŭlajecca ŭdzieł u vajskovych uračystaściach vojskaŭ, što zusim niadaŭna ździejśnili rabaŭnicki napad na našuju bratniuju susiedku Ŭkrainu. Takim čynam stvarajecca nadvyjčaj kiepski imidž Biełarusi jak paplečnika i sajuźnika ahresaraŭ i mižnarodnych złačyncaŭ.
Zrazumieła, što takim čynam siońniašniaje mienskaje kiraŭnictva imkniecca puścić pył u vočy rasiejskim haściam i kankretna U.Pucinu. Vyklikana heta tym, što palityčnaje vyžyvańnie dziejučaha režymu całkam zaležyć ad rasiejskaj padtrymki, asabliva ŭ finansavańni zbankrutavanaj ekanamičnaj madeli sučasnych biełaruskich uładaŭ.
U siońniašnich umovach dzień 3 lipienia jość nahodaj zadumacca nad tym, jak chutka ciapierašniaje kiraŭnictva krainy zdaje atrybuty dziaržaŭnaha suvierenitetu. Zaklučanyja kabalnyja i nievyhodnyja dla biełaruskaj ekanomiki pahadnieńni pra ŭtvareńnie z 2015 hoda Jeŭrazijskaha sajuzu. Pavialičvajecca kredytnaja zaležnaść Biełarusi ad hrošaj,što vydzialajucca Rasiejskaj Federacyjaj.
Pad vyhladam stvareńnia sumiesnych chołdynhaŭ rasiejski kapitał, pry dapamozie palityčnaha cisku z Kramla, biare pad kantrol najbolš sučasnyja i prybytkovyja biełaruskija pradpryjemstvy. Rasiejskija vajenna-pavietranyja siły naroščvajuć svaju prysutnaść u Biełarusi, a ŭ pierśpiektyvie płanujecca stvareńnie eksterytaryjalnaj rasiejskaj vajskovaj bazy, nad jakoj nie budzie navat farmalnaha suverenitetu Respubliki Biełaruś.
Na hetym tle niepierakanaŭča i słaba vyhladajuć pramovy Łukašenki pra nieabchodnaść nacyjanalnaj jednaści, skazanyja na biełaruskaj movie: dla dziaržaŭnaha dziejača i palityka niedastatkova kazać pa-biełarusku, a nieabchodna vieści prabiełaruskuju palityku ŭ intaresach biełaruskaha narodu,umacoŭvać nacyjanalny suvierenitet i nie handlavać ahulnanarodnym zdabytkam.
U takich umovach parad 3 lipienia vyhladaje jak varjacki rasiejski atrakcyjon, pir u čas čumy (darečy, za sapsavany ciažkoj branietechnikaj asfalt na vulicach Miensku buduć raspłočvacca aŭtamabilisty ŭsioj krainy – vidać, mienavita z hetaj metaj byŭ uviedzieny drapiežnicki hrašovy zbor «za dopusk aŭtamabilaŭ da darožnaha ruchu»).
Na vialiki žal, hety parad, jak i ŭsio śviata 3 Lipienia ŭ hetym hodzie, pieraŭtvarajecca ŭ demanstracyju zaležnaści siońniašniaha režymu ad jahonych rasiejskich patronaŭ».
Kamientary