«Nam treba ŭsialak vykarystoŭvać biełaruski rubiel i pryvučać zamiežnych hramadzian karystacca našaj valutaj unutry našaj krainy», — zajaviŭ ministr ekanomiki Biełarusi Uładzimir Zinoŭski 20 lutaha ŭ Minsku na pašyranym pasiadžeńni pastajannaj kamisii Pałaty pradstaŭnikoŭ pa dziaržaŭnym budaŭnictvie, miascovym samakiravańni i rehłamiencie.
«Ja prychilnik biełaruskaj ekanomiki i miarkuju, što my z vami pavinny pavažać biełaruski rubiel i ŭsialak jaho padtrymlivać», — padkreśliŭ jon.
Jak raniej paviedamlałasia, 1 sakavika ŭ Biełarusi spyniajecca vydača dazvołaŭ subjektam valutnych apieracyj na vykarystańnie ŭ raźlikach ź fizičnymi asobami zamiežnaj valuty pry ažyćciaŭleńni roźničnaha handlu i akazańni pasłuh na respublikanskich aŭtamabilnych darohach z numaracyjaj «M», «M/Je» i ŭ punktach propusku cieraź dziaržaŭnuju miažu; ažyćciaŭleńni strachavoj i turystyčnaj dziejnaści; realizacyi aŭtamabilnaha paliva i zvadkavanaha hazu.
«Nijakich prablemnych pytańniaŭ z punktu pohladu zapravak zamiežnymi pieravozčykami palivam niama, — skazaŭ Zinoŭski. — Usie zapraŭki na miažy abstalavanyja terminałami, i ŭžo daŭno viadoma, što kartkami možna raźličycca za bienzin».
Što da turyzmu, zaznačyŭ jon, dla Biełarusi «važna, kab turysty pryvozili valutu i raźmieńvali jaje na biełaruski rubiel».
«My pavinny advučać hramadstva ad niejkaj zamiežnaj valuty. Samaje hałoŭnaje, kab nie raśli ceny. Tady biełaruski rubiel budzie canicca i mieć takuju ž vahu, jak i lubaja inšaja valuta», — dadaŭ Zinoŭski.
Kamientary