Klučy ad duš čałaviečych

Usiomahutny Boh daŭ Bachu klučy ad duš čałaviečych. Jon mieŭ kryły ŭznosicca dumkami ŭ rajskija niabiosy, jakija napoŭnienyja eteram harmonii boskich hukaŭ, i prynosić ich na ziamlu, da čałavieka, zmučanaha ciažarami hrechu i spakusaŭ, sumnievaŭ i pakut. Jon lekavaŭ i lakuje čałaviečyja dušy hetymi boskimi hukami, i nichto nia moža zrazumieć, jak heta ŭdajecca — bo heta ž Božy cud! Adkryćciom ludziam svajoj Bohanatchnionaj tvorčaści ŭ muzycy Bach upadobniŭsia evanhielistu Janu Bahasłovu, jakomu Boh raskryŭ dla nas tajamnicy budučyni i viečnaści.

Nabližajecca najvialikšaje chryścijanskaje śviata — Uvaskrasieńnie Chrystova. U hety peryjad liturhičnaha hodu ŭ cerkvach hučyć adpaviednaja muzyka, jakaja dapamahaje hłyboka pieražyvać evanhielskija padziei. Adnym z najbolšych suśvietnych muzyčnych šedeŭraŭ, jakija apaviadajuć pra pakuty i śmierć Chrysta źjaŭlajecca manumentalny tvor vialikaha Johana Sabastyjana Bacha «Pasijony pavodle Maćvieja». Muzyka naležyć evanhieličnaj tradycyi chryścijanstva, ale jaje maštabnaść i mahutnaść, duchoŭnaja i mastackaja kaštoŭnaść daloka pieraŭzyšli miežy kanfesijnaści. Tamu nia tolki ŭ mnohich Evanhielična‑luteranskich i Evanhielična‑refarmackich cerkvach na Zachadzie, a taksama i ŭ Katalickim kaściole i na najbujniejšych filarmaničnych scenach usiaho śvietu vykanańnie «Pasijonaŭ», h. zn. «Pakutaŭ», u paschalny peryjad stała rehularnym.

Jak hłyboka Bach pracavaŭ ź biblijnym i muzyčnym tekstam i kolki zašyfravaŭ u svajoj muzycy, nakolki jana symbaličnaja — možna zrazumieć supastaŭlajučy jaje z adpaviednymi tekstami Śviatoha Piśma. U svaju čarhu, kampazytar hukavymi farbami «pierakładaje» jaho na emacyjanalnuju movu muzyki, muzyčnych afektaŭ, stanovicca sapraŭdnym prapaviednikam praz muzyku. Jak pisaŭ znakamity daśledčyk Nikalaŭs Arnankur, «kožnaja asobnaja častka, razam z adkrytym tłumačeńniem tekstu, źmiaščała ŭ sabie taksama hłybinnuju «hukavuju propaviedź». I choć dla bolšaści sučasnych słuchačoŭ baročnaja «hukavaja mova» i amal kožny jaje muzyčny skaz patrabuje tłumačeńniaŭ, bachaŭski šedeŭr uździejničaje i na iracyjanalnym uzroŭni, amal metafizyčna, mistyčna. I sapraŭdy, adčuvajecca, što hetaja mahutnaja muzyka stvorana pad kiraŭnictvam Ducha Śviatoha.

Usio heta zmohuć pačuć, adčuć, pieražyć na Vialikuju Piatnicu pierad Paschaj i biełarusy. Histaryčnaje vykanańnie «Pasijonaŭ pavodle Maćvieja» Jo.S.Bacha rychtujecca ŭ Miensku pad kiraŭnictvam znaŭcy baročnaj muzyki dyryžora Dźmi¬tryja Zubava. Najbolš aŭtarytetny siońnia ŭ halinie staradaŭniaj muzyki ansambl «Kamernyja salisty Miensku» razam ź Dziaržaŭnym kamernym choram Biełarusi i šeraham salistaŭ z‑za miažy ŭdzielničajuć u hetym histaryčnym mižnarodnym prajekcie. Histaryčnym jašče i tamu, što muzyki buduć ihrać na staradaŭnich instrumentach (kopijach) u aŭtentyčnaj maniery vykanalnictva, što maksymalna nablizić nas da hučańnia mienavita bachaŭskaj pary. Na Zachadzie takija interpretacyi ŭžo nia redkaść. Dla Biełarusi heta budzie ŭpieršyniu.

Hety mižnarodny prajekt ažyćciaŭlajecca pry dabrasłavieńni Evanhieličnaj Refarmackaj carkvy i Chryścijanskaj carkvy «Słova viery».

Kancert adbudziecca 21 sakavika a 19.00 u Vialikaj Kancertnaj zali Biełdziaržfilarmonii.

• 0
• 0
• 0
• 0
• 0
• 0
• 0
• 0