18 sakavika ŭ Biełaruś nie puścili frontmena ŭkrainskaha hurta «Fiolet» Siarhieja Martyniuka. Try kancerty z-za hetaha byli sarvanyja. Biełaruskija pamiežniki skazali Martyniuku, što jon nieŭjazny ŭ Rasiju. A značycca, i ŭ Biełaruś, jakaja ŭvachodzić razam z RF u tak zvanuju sajuznuju dziaržavu.
«Jość pahadnieńnie ŭ miežach sajuznaj dziaržavy, jano tyčycca raboty z asobami, jakim zabaronieny ŭjezd na terytoryju Biełarusi ci terytoryju Rasii. Tamu isnujuć peŭnyja abmiežavańni, jakija raspaŭsiudžvajucca i na našaj, i na rasijskaj miežach», — tłumačyć situacyju pres-sakratar Dziaržaŭnaha pamiežnaha kamiteta Biełarusi Alaksandr Ciščanka.
Adpaviedna, kali Biełaruś zabaraniaje niekamu ŭjezd, to čałaviek z-za hetaha nie zmoža lehalna trapić u Rasiju.
Tym časam u RF padniałasia čarhovaja chvala za toje, kab zabaranić ujezd dziejačam ukrainskaj kultury. Hramadzianie stvarajuć pietycyi, rasijskija deputaty niaredka vykazvajucca na hety kont. U pieršuju čarhu, hutarka pra Śviatasłava Vakarčuka z hurta «Okiean Elzi» i Uładzimira Zialenskaha z «Kvartała 95».
Taksama ad rasijan masava dastajecca Nastaśsi Prychodźka, Rusłanie, jakaja nie adnojčy vystupała ŭ šou na biełaruskich kanałach, i Alehu Skrypku z «Voplaŭ Vidoplasova» — taksama častamu hościu ŭ Biełarusi. I vielmi dziŭna, što Rasija raptam uziałasia za salista pakul nie nastolki papularnaha hurta «Fiolet».
Darečy, ułasnyja čornyja śpisy ŭžo skłała Ukraina. Sioleta ŭ kancy lutaha stała viadoma, što ŭjezd zabaranili papularnamu biełaruskamu muzyku Maksu Karžu. Zdaryłasia heta z-za taho, što jon nie tak daŭno hastralavaŭ u Krymie.
Prablema z bazami dadzienych, jakimi karystajucca pamiežniki, padymajecca nie ŭpieršyniu. Razabracca ŭ situacyi niaprosta. Toj ža Siarhiej Martyniuk z hurta «Fiolet» tak i nie zrazumieŭ, čamu jaho zrabili nieŭjaznym u Rasiju.
«Jon nikoli tam nie byŭ i być nie płanavaŭ», — harantuje mieniedžar hurta Maryna Chramych.
Tym nie mienš, mieniedžar uvajšła na sajt Fiederalnaj mihracyjnaj słužby RF, dzie možna pravieryć, na jakich padstavach hramadzianinu zabaronieny ŭjezd u Rasiju. Kali Maryna zapoŭniła formu na sajcie, to akazałasia, što… pretenzij da Siarhieja Martyniuka niama. Praŭda, sajt viedamstva papiaredžvaje, što dla atrymańnia jurydyčna značnaj infarmacyi treba vysyłać aficyjny zapyt.
Źjavilisia zdahadki, što zabaronami Rasii mohuć prykryvacca biełaruskija čynoŭniki i pravaachoŭniki. Pavodle infarmacyi Jeŭraradyjo, raniej kancerty hurta «Fiolet» u Biełarusi taksama zryvalisia. Arhanizatary nie mahli atrymać dla hetaha hastrolnaje paśviedčańnie. Tamu vykazvalisia zdahadki, što «Fiolet», jaki śpiavaje pieravažna apalityčnuju liryku, niejkim čynam trapiŭ u tak zvanyja «čornyja śpisy» biełaruskaha Minkulta (najaŭnaść takich śpisaŭ — sakret polišynela).
Na hety raz «hastrolku» na vystupy hurtu dali, ale salista nie prapuścili na miažy. «Fiolet» z hetaj nahody źbirajecca źviarnucca ŭ pasolstva Biełarusi va Ukrainie. I, kali spatrebicca, va ŭsie mahčymyja biełaruskija i ŭkrainskija pravaachoŭnyja orhany, kab vyśvietlić, čamu ich muzykant nie moža trapić u našu krainu.
Muzyka Cim Suładze: Roźnica 30 hadoŭ — toje, što adpaviadaje maim ujaŭleńniam pra adnosiny41
Kamientary