Staršynia Centralnaj kamisii pa vybarach i praviadzieńni respublikanskich refierendumaŭ Lidzija Jarmošyna ličyć, što deputatami pavinny stanavicca ludzi, jakija ŭžo zrabili karjeru. Pra heta jana raskazała ŭ intervju karespandentu BIEŁTA.
Na pytańnie ab tym, ci nie pryjšoŭ čas panizić u Biełarusi ŭzrostavy paroh dla patencyjalnych kandydataŭ na parłamienckaje kresła, staršynia CVK adkazała admoŭna.
«Ja naohuł liču, što niama čaho rabić moładzi ŭ deputackim korpusie. Kali my tolki chočam atrymać razbałavanaha čałavieka, jaki ničoha nie ŭmieje, ale ŭžo maje vialikija ambicyi (i časta potym - niaščasnaha), to tady davajcie zapuskać hety praces. Heta ŭ saviecki čas było vyhadna, kab u parłamiencie ličyłasia niekalki dajarak, śvinarak, asob da 30-ci hadoŭ i hetak dalej, tamu što pad heta pisalisia rejtynhi. Ale ludzi nie byli prafiesijnymi parłamientaryjami. I pracujučy tokaram na zavodzie, navučajučysia zavočna ŭ instytucie i budučy 22-hadovym maładym čałaviekam, možna było narmalna pryjazdžać na siesii parłamienta na dzień-dva ŭ hod, i, u pryncypie, heta ničym nie pieraškadžała ni tamu žyćciu, jakoje čałaviek vioŭ, ni jaho karjernamu rostu», — adznačyła jana.
«Čamu nichto nie dumaje, asabliva tyja, chto chočuć vybiracca z moładzi, što jany potym naohuł rabić buduć? Čałaviek u 20 hadoŭ prychodzić u parłamient, jon jašče ničoha nie ŭmieje, tolki čytać i pisać i, mahčyma, maje niejkija elemientarnyja viedy ŭ toj ci inšaj śfiery. U toj ža čas jon užo nabyvaje važki deputacki status. Praz čatyry hady dzie my jaho vykarystoŭvać budziem? Jon ža budzie zubami chapacca za heta miesca ŭ parłamiencie, tamu što bolš ničoha rabić nie ŭmieje. Nu, vybrali, moža być, jaho druhi raz, ale što dalej? Pojdzie pracavać u škołu ci balnicu? Naŭrad ci. Što ž my majem u astatku? Prostaha namienkłaturnaha biespracoŭnaha, jakoha treba abaviazkova pracaŭładkavać, ale jaho nichto brać nie choča, tamu što jon ničoha nie ŭmieje. Voś tak atrymlivajecca apazicyja», — ličyć Lidzija Jarmošyna.
«Ja za toje, kab u parłamient pierš za ŭsio išli ludzi, jakija zrabili karjeru i jakija nie prapaduć paśla taho, jak ich nie vybieruć na hetu pasadu paŭtorna. Jany ŭsio roŭna zapatrabavany, ich možna ŭžo ministrami naznačać paśla vopytu ŭ zakanatvorčaj dziejnaści. Voś jakoha mierkavańnia ja prytrymlivajusia. Usie razmovy pra moładź u parłamiencie liču papulisckimi, škodnymi i niedalnabačnymi», — padkreśliła staršynia Centrvybarkama.
Kamientary