Taćciana Karatkievič sabrała 1400 podpisaŭ i padała dakumienty na rehistracyju kandydatam u deputaty
Sustaršynia kampanii «Havary praŭdu» Taćciana Karatkievič 29 lipienia padała dakumienty na rehistracyju kandydatam u deputaty pa Kastryčnickaj akruzie № 97 Minska. «Try tydni ja i maja kamanda źbirali podpisy: chadzili pa kvaterach, stajali ŭ pikietach. U vyniku sabrali 1.400 podpisaŭ», — paviedamiła jana.
Karatkievič spadziajecca, što jaje zarehistrujuć i jana zmoža «jašče bolš ludziej aznajomić z prahramaj «Havary praŭdu», jaje bačańniem budučyni». «Mnohija ludzi, jakija padychodziać da mianie, kažuć mnie, kab ja išła napierad, žadajuć pośpiechu», — skazała palityk.
Karatkievič adznačyła, što astatnija pretendenty ŭ deputaty ad «Havary praŭdu» buduć padavać dakumienty na rehistracyju kandydatami ŭ deputaty 1 žniŭnia. «Amal usie pretendenty ŭžo sabrali nieabchodnuju kolkaść podpisaŭ. Usie našy kandydaty vyłučajucca šlacham zboru podpisaŭ. My pracujem pa maksimumie, kab nas bačyli, my byli prykmietnymi, dastupnymi i zrazumiełymi vybarščykam», — padkreśliła jana.
Jakich-niebudź pretenzij z boku akruhovaj kamisii da jaje inicyjatyŭnaj hrupy nie było, zaŭvažyła Karatkievič.
Jak paviedamlałasia raniej, u śpisie pretendentaŭ na miesca ŭ parłamiencie ad «Havary praŭdu» 29 čałaviek. Vyłučajecca taksama jašče adzin sustaršynia kampanii Andrej Dźmitryjeŭ.
Z 29 pretendentaŭ tolki piaciora majuć vopyt udziełu ŭ parłamienckich vybarach u jakaści kandydataŭ u deputaty, dźvie traciny — uvohule nie mieli dačynieńnia da aktyŭnaj palityki.
Pretendenty ad «Havary praŭdu» vystupajuć na parłamienckich vybarach z ahulnaj stratehijaj mirnych pieramien i adzinym pasłańniem da vybarščykaŭ.
Karatkievič ŭdzielničała ŭ vybarach 2015 hoda ŭ jakaści kandydata ŭ prezidenty.
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary