Chiłary Klintan i Donald Tramp ŭ chodzie trecich i apošnich teledebataŭ ŭ Łas-Viehasie paspračalisia ab pravie na aborty, ab pravie amierykancaŭ na našeńnie zbroi i ab Uładzimiry Pucinie.
Kandydaty ŭ prezidenty ZŠA pačali debaty va Univiersitecie Nievady, admoviŭšysia ad pocisku ruki.
Chiłary Klintan źjaviłasia ŭ biełym kaściumie, jaje apanient pryjšoŭ u čornym harnitury i čyrvonym halštuku.
Televizijnyja debaty ŭ Łas-Viehasie pačalisia z pytańnia pra Viarchoŭny sud i toje, jak kanstytucyja ZŠA pavinna traktavacca.
Druhaja tema, jakaja radykalna raździalała apanientaŭ, — prava na aborty.
Kandydat ad Demakratyčnaj partyi paabiacała abaraniać prava na aborty. «Ja budu abaraniać «Rou suprać Uejda», — skazała Klintan, spasyłajučysia na rašeńnie Viarchoŭnaha suda 1973 hoda ab lehalizacyi abortaŭ.
Tramp ž vykazaŭ upeŭnienaść, što ŭ vypadku jaho abrańnia Viarchoŭny sud admienić rašeńnie ab lehalizacyi abortaŭ, a zdarycca heta tamu, što jon pryznačyć sudździaŭ, jakija vystupajuć «za žyćcio».
Nieŭzabavie paśla pačatku debataŭ kandydaty ŭ prezidenty zakranuli pytańnie adnosin z Rasijaj. Chiłary Klintan zajaviła, što rasijski prezident Uładzimir Pucin chacieŭ by, kab prezidenckaje kresła zaniała jaho maryjanietka, vidavočna namiakajučy na padtrymku Pucinym jaje supiernika.
Donald Tramp zapiarečyŭ, što nie budzie maryjanietkaj Pucina i skazaŭ, što Klintan nie padabajecca Pucin z-za taho, što jon «pierachitryŭ» jaje pa ŭsich kirunkach.
«Ja nie znajomy z Pucinym, ale chacieŭ by ŭzajemadziejničać ź im … Joj nie padabajecca Pucin, bo Pucin abchitryŭ jaje ŭ Siryi i ŭsiudy», — skazaŭ Tramp.
Apytańnie, praviedzienaje telekanałam Si-En-En, pakazvaje, što 52% paličyli pieramožcam trecich debataŭ Klintan, a 39% — Trampa. Heta aznačaje, što vystup naŭrad ci dapamoža miljarderu zdahnać Chiłary ŭ rejtynhach papularnaści. Sacyjałahičnyja apytańni apošniaha tydnia davali Klintan pieravahu ŭ 7—11%. Ź vialikaj imaviernaściu pieršy raz u historyi ZŠA prezidentkaj moža stać žančyna.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju5
Kamientary