U Biełarusi pavialičvajecca kolkaść dziaciej, jakija chvarejuć na aŭtyzm, paviedamiła 30 sakavika na pres-kanfierencyi ŭ Minsku hałoŭny psichijatr Ministerstva achovy zdaroŭja Śviatłana Dzialendzik.
U 2008 hodzie pad nazirańniem psichijatraŭ znachodziłasia 338 takich dziaciej, u 2007-m –– 307, u 2006 hodzie — 280.
Samaje vysokaje zachvorvańnie ŭ krainie adznačajecca ŭ Bresckaj vobłaści (67 chvorych na aŭtyzm u 2008 i 2007 hadach, 53 –– u 2006-m) i Minskaj vobłaści (u 2008 hodzie –– 65, u 2007-m –– 60, u 2006 hodzie –– 53). U Minsku zarehistravana 66 chvorych na aŭtyzm dziaciej (u 2006 hodzie –– 53, u 2007 hodzie –– 67).
Charakterna, što ŭ Biełarusi dyjahnaz "aŭtyzm" čaściej za ŭsio staviać dzieciam u try-čatyry hady, u toj čas jak pieršyja simptomy zachvorvańnia prykmietny ŭ dziciaci ŭžo ŭ niemaŭlackim ŭzroście.
Pavodle słoŭ hałoŭnaha psichijatra, raspaŭsiudžanaść aŭtyzmu ŭ śviecie vahajecca ad 40 da 45 vypadkaŭ na 10 tys. novanarodžanych.Heta bolš, čym, da prykładu, raspaŭsiudžanaść takich zachvorvańniaŭ, jak dziciačaja hłuchata, ślepata abo sindrom Daŭna. Rost chvorych na aŭtyzm dziaciej, zaznačyła śpiecyjalist, tłumačycca "bolš dakładnaj dyjahnostykaj zachvorvańnia" i najaŭnaściu vysokakvalifikavanych śpiecyjalistaŭ, zdolnych jaho dyjahnastavać.
Hałoŭny psichijatr padkreśliła, što ŭ 1970—1980 hady naziraŭsia ŭsplosk navukovych daśledavańniaŭ aŭtyzmu, i heta palepšyła dyjahnostyku zachvorvańnia. S.Dzialendzik zaznačyła, što siarod pryčyn aŭtyzmu vučonyja nazyvajuć hienietyčny faktar.
Aŭtyzm – ciažkaje psichičnaje zachvorvańnie, jakomu ŭłaściva skažonaje raźvićcio psichiki dziciaci.Bolšaść chvorych dziaciej častkova abo poŭnaściu admaŭlajucca ad kantaktaŭ z navakolnymi. U ich nazirajecca intelektualnaje niedaraźvićcio. U 55—60% aŭtyčnych dziaciej nazirajecca hłybokaja razumovaja adstałaść, u 15—20% –– lohkaja razumovaja adstałaść.
Kamientary