«Namiaknuli, što mohuć zabrać dzicia». Haradzienka, muža jakoj zatrymali ź Cichanoŭskim, paviedamiła pra cisk
Ranicaj 17 červienia da Vitalii Navumik pryjšli dadomu pradstaŭniki dziciačaha sadu: pravieryć umovy pražyvańnia. U Vitalii spytali, čamu jana davała intervju, i namiaknuli, što mohuć zabrać dzicia z-za zatrymańnia muža. Uładzimira Navumika zatrymali 29 maja na Savieckaj płoščy ŭ Hrodnie razam z błohieram Siarhiejem Cichanoŭskim, piša hrodna.life.
Uładzimiru Navumiku vystavili abvinavačvańnie pa č. 1 art. 342 KK (Arhanizacyja i padrychtoŭka dziejańniaŭ, što hruba parušajuć hramadski paradak). Jon zastajecca, jak i inšyja zatrymanyja ŭ toj dzień, u minskim SIZA №1. Vitalija kaža, što muža zatrymali vypadkova, kali jon prachodziŭ pobač i zacikaviŭsia tym, što adbyvajecca na płoščy.
«Da mianie siońnia pryjšli ź dziciačaha sadka №96 zahadčyca, vychavalnik i psichołah. Pravieryli dziciačy pakoj, šafy i chaładzilnik. Potym my vyjšli ŭ kalidor, bo ŭ mianie doma ŭ vannym pakoi ramont, i jany spytali ŭ mianie, čamu moj muž pajšoŭ na pikiet, mahčyma, jon hrošaj chacieŭ tam zarabić, čamu ja davała intervju Hrodna.life i ci davała ja jaho naohuł. Taksama spytali pra baćkoŭ muža».
Vitalija kaža, što paśla hetaha joj začytali dakumient, u jakim było napisana, što padčas pieratrusu paśla zatrymańnia muža ŭ kvatery byŭ biesparadak, valalisia byčki i butelki z-pad śpirtnoha.
Pa słovach Vitalii, u dakumiencie była infarmacyja ab tym, što jana nibyta palić pry dziciaci. Jana heta admaŭlaje.
«Ja skazała, što ŭ nas u siamji nie palać i nie pjuć. A jany mnie ŭ adkaz: vy razumiejecie, što ŭ vas zabiaruć dzicia? Maŭlaŭ, budziem raźbiracca, źbirać dakumienty i charaktarystyku ź miescaŭ pracy».
Vitalija kaža, što jany — samaja zvyčajnaja siamja, žyvuć narmalna, u sacyjalna niebiaśpiečnym stanoviščy nie znachodziacca. Dzicia chodzić u sad, płaciać za jaho spraŭna.
Vitalija kaža, što muž zaŭsiody zajmaŭsia dačkoj, pastajanna vadziŭ jaje na treniroŭki pa himnastycy. Muž i žonka vykonvali ŭsie abaviazki, jakija pavinny vykonvać baćki.
«Ja vielmi bajusia, što ŭ mianie zabiaruć dzicia. Ja nie viedaju, čamu jany tak robiać. Liču, jany akazvajuć na mianie cisk. Dumaju, heta ŭsio źviazana z zatrymańniem muža».
Prachodzić sacyjalnaje rasśledavańnie
Zahadčyca dziciačaha sada №96 Śviatłana Jančaniuk raspaviała Hrodna.life, što jany nie akazvali cisku na Vitaliju Navumik. Prosta pryjšli da jaje pahavaryć i pravieryć umovy pražyvańnia.
«My atrymali papieru i na padstavie jaje pryjšli aznajomicca. My ciapier pravodzim sacyjalnaje rasśledavańnie, jakoje doŭžycca 15 dzion. Nijakaha cisku na mamu nie ažyćciaŭlajecca. Usio prachodzić u ramkach zakona i ničoha nie parušajecca.
My pryjechali pahladzieć umovy pražyvańnia i ŭtrymańnia dziciaci ŭ ramkach dekreta prezidenta №18 ad 24 listapada 2006 h. («Ab dadatkovych mierach pa dziaržaŭnaj abaronie dziaciej u prablemnych siemjach» — red.). Usio robicca pavodle dakumientaŭ. Dzicia ŭ ich aktyŭnaje, dziaŭčynka viasiołaja ŭ sadzie, zaŭsiody achajnaja. Nijakich faktaraŭ, što spryjajuć adabrańniu dziciaci, u ich u siamji niama», — raspaviała zahadčyca.
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary