U Homieli pierad sustrečaj «suprać Łukašenki» zatrymali byłoha ŭdzielnika vybarčaj kampanii
Byłoha pretendenta ŭ kandydaty na pasadu prezydenta Biełarusi Ŭładzimiera Niapomniaščych zatrymali ŭ Homli za paŭhadziny da sustrečy vybarcaŭ pa ahitacyi suprać kandydata ŭ prezydenty Alaksandra Łukašenki, piša «Radyjo Svaboda».
U Homli na 18 lipienia anansavali sustreču vybarcaŭ pa ahitacyi suprać kandydata ŭ prezydenty Alaksandra Łukašenki. Takija sustrečy dazvalaje artykuł 45 Vybarčaha kodeksu. Ahitacyja planavałasia na 12.00, ale prykładna ŭ 11.30 zajaŭnika sustrečy Ŭładzimiera Niapomniaščych zatrymała milicyja.
Niapomniaščych byŭ adzinym zarehistravanym pretendentam u kandydaty na prezydenta z troch dziasiatkaŭ «kandydataŭ pratestu» Mikoły Statkieviča. Jon nie źbiraŭsia padavać podpisy i vykarystoŭvaŭ pikiety dla infarmavańnia hramadztva.
«Miarkuju, heta zroblena, kab sarvać siońniašniaje mierapryjemstva», — zaznačyŭ pravaabaronca Vasil Palakoŭ.
Abviestka pra sustreču vybarcaŭ była raźmieščana na aficyjnym sajcie administracyi Čyhunačnaha rajona Homla.
Zranku kala Centru inkluziŭnaj kultury, dzie planavałasia sustreča, dziažurać supracoŭniki milicyi. U prylehłym dvary na vulicy Jubilejnaj staić čyrvony mikraaŭtobus z supracoŭnikami AMAP.
Niahledziačy na zatrymańnie, sustreča raspačałasia i prachodzić u farmacie «svabodny mikrafon». Jaje pravodzić pravaabaronca Vasil Palakoŭ. U zali prysutničaje kala 50 čałaviek.
Kamientary