Biełaruskaja apazicyja źviartałasia da pasła Rasii ŭ Biełarusi Dźmitryja Mieziencava z prośbaj ab asabistaj sustrečy, ale dypłamat razmaŭlać admoviŭsia, raspavioŭ jon u intervju telekanału RBK. Pa słovach Mieziencava, rasijskija dypłamaty nie hatovy vieści razmovu z tymi siłami, jakija nakiravany na «padryŭ dziaržaŭnych asnoŭ».
«Rasijskaje pasolstva hatova razmaŭlać z tymi hramadskimi siłami, jakija nie viaduć pracy pa padryvie dziaržaŭnych asnoŭ Respubliki Biełaruś», — patłumačyŭ pasoł.
Pa słovach Mieziencava, prośbu ab sustrečy pradstaŭniki biełaruskaj apazicyi nakiroŭvali jamu asabista. «Pradmietam sustrečy paznačalisia u tym liku napramki ŭzajemadziejańnia tak zvanaj Kaardynacyjnaj rady z Rasijskaj Fiederacyjaj», — raspavioŭ jon.
Pa słovach Mieziencava, jon nie razumieje sutnaść Kaardynacyjnaj Rady biełaruskaj apazicyi i ŭ jakoj arhanizacyjnaj formie jana isnuje. «Jana adna abo ich, moža być, piać, abo dvaccać — heta ludzi, jakich nichto nikoli nie vybiraŭ, heta ludzi biez davieru miljonaŭ vybarščykaŭ. Heta ludzi, jakija sami siabie vyznačyli takimi. Nie varta ciapier vyznačać matyvacyju hetych učynkaŭ. Ale heta takoje adno z hramadskich abjadnańniaŭ, moža być, takoje ž, jak hramada amataraŭ knihi, fiłatelistaŭ, numizmataŭ, zaŭziataraŭ taho ci inšaha kłuba. Ale tady jany i pavinny zajmacca ŭ hramadskim poli kłubnaj pracaj, a nie zajmacca źviaržeńniem ułady», — tak rasijski pasoł adazvaŭsia ab pracy Rady.
Reakcyju ŭładaŭ Biełarusi na stvareńnie i pracu Kaardynacyjnaj rady jon nazvaŭ «adekvatnaj i kanstytucyjnaj».
Kamientary