Dziaŭčynka ŭ Hrodnie pamierła ad siezonnaha hrypu

U sieradu 9 lipienia hazieta «Viečiernij Hrodno» paviedamiła, što miedeksperty znajšli ŭ pamierłaj ŭ Hrodna minułym hodzie dziaŭčynki virus hrypu A/H1N1. Dziaŭčynka zhasła za dva tydni. Apošnija dni jana praviała ŭ reanimacyi dziciačaj abłasnoj balnicy z dyjahnazam sieptyčnaja forma salmanielozu.

Vyniki sudova-miedyčnaj ekśpiertyzy stali viadomyja dniami. Adździeł składanych ekspertyzaŭ Upraŭleńnia sudova-miedyčnych ekśpiertyzaŭ (Minsk) nibyta vyśvietliŭ, što dziaŭčynka pamierła ad hrypu A/H1N1.

Jak stała viadoma, u Ministerstvie achovy zdaroŭja pra hety vypadak nie viedali. Paśla pračytańnia publikacyi ŭ «Viečierniem Hrodno» pradstaŭniki ministerstva źviarnulisia z zapytam da sudmiedekśpiertaŭ.

9 lipienia ŭ Ministerstvie achovy zdaroŭja pravieryli dakładnaść infarmacyi, apublikavanaj u «VH», paviedamlaje BiełaPAN. Jak zajaviła hałoŭny epidemijołah, u artykule adbyłasia błytanina. Pavodle zaklučeńnia sudmiedekśpiertaŭ, dziaŭčynka sapraŭdy pamierła ad virusu hrypu A(H1N1), adnak heta nie tak zvany śviny hryp, a siezonny. Pavodle jaje słoŭ, niahledziačy na adnolkavuju nazvu — A(H1N1) — śviny hryp i siezonny majuć roznuju hienietyčnuju pryrodu. U vieraśni minułaha hoda virusu śvinoha hrypu jašče nie było ni ŭ Mieksicy, ni tym bolš u Biełarusi, padkreśliła Karaban.

Jak zajaviŭ BiełaPAN hałoŭny sudova-miedycynski ekśpiert Biełarusi Juryj Husakoŭ, u zaklučeńni ekśpiertnaj kamisii virus H1N1 nie fihuruje. Ustanoŭlena, što dziaŭčynka chvareła siezonnym virusam hrypu typu A i pamierła ad uskładnieńnia hetaha zachvorvańnia — zapaleńnia lohkich. «Padtyp hrypu nie ŭkazvajecca ŭ jakaści pryčyny śmierci», — skazaŭ Husakoŭ. Pavodle jaho słoŭ, dla vyznačeńnia virusu śvinoha hrypu nieabchodna śpiecyjalnaja aparatura. Adnak u hetym vypadku nie było patreby jaje ŭžyvać: dziaŭčynka pamierła ŭ vieraśni 2008 hoda, kali pra virus śvinoha hrypu jašče nie viedali.

***

Virus hrypa A(H1N1) upieršyniu byŭ zafiksavany naprykancy krasavika 2009 hoda ŭ Mieksicy i adrazu ž atrymaŭ nazvu «miesikanskaha» (paźniej nazvu źmianili na «śviny hryp»). Na dadzieny momant ahulnaja kolkaść tych, chto zachvareŭ hrypam «A» pieravysiła 27 700 čałaviek u 74 krainach śvietu, 141 vypadak skončyŭsia śmierciu chvorych, bolšaść letalnych sychodaŭ zafiksavanyja ŭ Mieskicy — bolš za sto vypadkaŭ.

Siarod chvorych na hryp A(H1N1) jość i hramadzianka Biełarusi, jakaja stała žyvie ŭ Italii. 26 maja jana trapiła ŭ balnicu Maskvy. Na toj momant jana ažyćciaŭlała turystyčnuju pajezdku pa ZŠA, Čechii i Rasii. U susiednich z nami krainach taksama byli zafiksavanyja vypadki zachvorvańnia — adzin u Polščy, try ŭ Rasii. Va ŭsich vypadkach hryp byŭ zaviezieny z ZŠA.

12 červienia 2009 Suśvietnaja arhanizacyja zdaroŭja abjaviła pra pačatak pandemii «śvinoha hrypu».

• 0
• 0
• 0
• 0
• 0
• 0
• 0
• 0