Amal 100 dzion u niavoli — mužu i žoncy dali čarhovyja sutki za reposty ŭ pryvatnaj pierapiscy. Što adbyvajecca?
Dramatyčnaja historyja siamji biełarusaŭ Krupienič-Kandraćjevych praciahvajecca: Anastasija i Siarhiej užo adsiadzieli 84 dni za reposty z «ekstremiścich» tełahram-kanałaŭ u pryvatnaj pierapiscy. Siońnia, jak stała viadoma «Našaj Nivie» ad advakataŭ, ich asudzili znoŭ — Anastasii dadali jašče 14 sutak, a Siarhieju — 15.
Na hety raz spravu ŭ sudzie Leninskaha rajona razhladała Julija Inčyna. Jak paviedamlaje pravaabarončy centr «Viasna», zhodna z novym pratakołam, «Anastasija 21 červienia raspaŭsiudziła ekstremiscki materyjał, pierasłaŭšy z pryznanaha ekstremisckim tielehram-kanała paviedamleńnie mužu pra skaračeńnie kadraŭ u MUSie».
Anastasija raniej pracavała nastaŭnicaj u minskaj himnazii, jaje muž — prahramist.
Pieršy raz paru zatrymali jašče ŭ lipieni. Jak nam viadoma z ułasnych krynic, siamjoj zacikavilisia paśla viartańnia z kamandziroŭki ŭ Polščy. Na ich kvateru pryjšli z vobšukam, a ŭ vyniku ŭ Leninskim RUUS skłali adrazu try pratakoły za reposty adno adnamu z telehram-kanałaŭ, pryznanych ekstremisckimi (artykuł 19.11 KaAP).
25 žniŭnia ich vypuścili ź izalatara pieršy raz, ale, kali para viarnułasia dadomu, ich tam znoŭ čakali supracoŭniki milicyi. Siamji nastojliva rekamiendavali pryjści zranku ŭ RUUS dla prafiłaktyčnych mierapryjemstvaŭ, ale ŭ vyniku supracoŭniki milicyi skłali na muža z žonkaj novyja pratakoły: Siarhiej i Anastasija atrymali pa 15 sutak kožny. Doma jany prabyli ŭsiaho adzin viečar.
Paśla hetaha paru znoŭ vypuścili ź izalatara na Akreścina ŭ vieraśni i pierazatrymali čarhovy raz. Siońniašni sud nad imi staŭ siomym pa liku.
Pa słovach byłych sukamiernikaŭ Nastaśsi i Siarhieja, u izalatarach jany pierachvareli na karanavirus, mocna schudnieli. Za taki praciahły čas u niavoli maładziony padarvali svajo zdaroŭje: u izalatarach administracyjna asudžanym nie addajuć pieradačy, nie vydajuć matracy i bializnu, nie vyvodziać na špacyry, praź pierapoŭnienaść kamier ludzi vymušanyja spać na padłozie. Taksama asudžanych pazbaŭlajuć snu: štonoč budziać a 2-j i 4-j hadzinach.
Kolki jašče siamja budzie za kratami?
Na žal, adkazać na heta pytańnie dakładna niemahčyma. Raspaŭsiud infarmacyjnaj pradukcyi, pryznanaj ekstremisckaj, jak pravaparušeńnie maje svoj termin daŭniny: ciapier heta hod (punkt 3 artykuła 7.6 KaAP).
Kolkaściu prysudžanych sutak Nastaśsia i Siarhiej imkliva nabližajucca da raniejšych rekordaŭ z administracyjnymi aryštami: raniej 115 sutak u izalatarach adbyvaŭ student BDUIR Jan Sałanovič, jaki raniej pracavaŭ u navukova-techničnym centry KDB. 105 sutak u niavoli ŭ svoj čas praviała aktyvistka z Homiela Anastasija Pieravoščykava. Pravaabaroncy pryznali ich palitviaźniami.
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju3
Kamientary