«U vioscy jość voziera, tam płaty pastavili». Daviedalisia, u čym pryčyna svarki dački eks-ministra, što patrapiła na źliŭ byłych siłavikoŭ
U źlitym siońnia aŭdyja ad byłych siłavikoŭ havorka išła pra «adpracoŭku» žychara Dziaržynskaha rajona Kalinoŭskaha, «susieda dački ministra», svarka ź jakim i stała pryčynaj taho, što na samym vysokim uzroŭni jaho «paprasili pastavić na miesca». Jak stała viadoma «Naša Nivie», havorka ŭ aŭdyja išła pra dačku byłoha ministra sielskaj haspadarki Leanida Zajca.
«Nu, typu pierabityja numary. Padazreńnie. Nam kamanda hienierała, bł****, pad jaho pracavać jak pałožana. U Kopišava (proźvišča načalnika kryminalnaj milicyi UUS Minabłvykankama — zaŭv. «NN») heta na kantroli. Nu, voś treba było niejak mašynu zabrać, voś i zabrali. Prydumali. […]
Heta ŭ ministra na kantroli staić. Tam jon, bł****, susied adnoj z dačok ministra sielskaj haspadarki, tak skažam. Tam u ich vajna miž saboj. Skazali pa im papracavać, voś i ŭsio — pracujem», — idzie havorka padčas razmovy.
«Susied adnoj z dačok ministra sielskaj haspadarki. Zadača — jaho na miesca pastavić». Źjaviŭsia novy źliŭ ad byłych siłavikoŭ
Jak stała viadoma «Našaj Nivie», historyja adbyłasia ŭ vioscy Uzrečča Dziaržynskaha rajonu.
Fihuranty historyi — žychar vioski 55-hadovy Anatol Kalinoŭski i siamja Łahunovičaŭ — Alaksandr i Natalla. Natalla Łahunovič — u dziavoctvie Zajac, dačka byłoha ministra sielskaj haspadarki Leanida Zajca. Zaraz jaje tata — staršynia Mahiloŭskaha abłvykankama.
U čym ža pryčyna svarki ludziej, jakija žyvuć pobač? Detali ich kanfliktu nam raskazali susiedzi Kalinoŭskaha i Łahunovičaŭ.
«Sens u tym, što ŭ vioscy jość voziera, a tam navokał płaty pastavili — niemahčyma da jaho ŭžo padyści, usio paznosili, dzie raniej ludzi adpačyvali, rybačyć užo niama jak.
Tolik (Kalinoŭski — Red.) pajšoŭ skardzicca ŭ sielski saviet, maŭlaŭ, što ž heta takoje, čamu heta ŭsio zabarykadavali, akupavali, ni mietra, ni paŭmietra nie pakinuli, kab da vady prajści.
Nu, voś z hetaha ŭsio i pačałosia, jaho ciapier tak cisnuć, što jamu ŭžo ni voziera, ničoha nie chočacca», — raskazali «Našaj Nivie» žychary vioski.
Sam Anatol Kalinoŭski pra hetuju historyju ničoha nie skazaŭ, skazaŭ tolki, što ŭ jaho sapraŭdy aryštoŭvali mašynu — viarnuli praz try tydni, a taksama što troje sutak pravioŭ u IČU.
Admietna, što i Kalinoŭski, i Łahunovič jeździć na adnolkavych aŭto — Volvo XC90.
Hubiernatarskaja dačka, Natalla Łahunovič, pačuŭšy pytańnie «Našaj Nivy» pra situacyju, skazała, dasłoŭna: «Oj, usio, da pabačeńnia!»
Ciapier čytajuć
U Pskovie rasijanin zabiŭ biełarusa Valeryja za toje, što toj patrabavaŭ pavažać biełaruskuju nacyju5
Kamientary