U palitźniavolenaj Taćciany Kanieŭskaj značna pahoršyłasia zdaroŭje. Jana 20 dzion praviała ŭ ŠIZA
55-hadovuju palitźniavolenuju Taćcianu Kanieŭskuju na dvaccać dzion źmiaścili ŭ ŠIZA homielskaj kałonii ź nieviadomaj pryčyny. U jaje značna pahoršyŭsia stan zdaroŭja, piša «Radyjo Svaboda».
U liście na volu Taćciana piša spačatku z humaram: «Była ŭ štrafnym izalatary, trapiłasia haračaja pucioŭka. Spačatku na 10 dzion, potym vyrašyli padoŭžyć kantrakt:). Pryčyna — pry sustrečy. U pryncypie, mnie i rabić ničoha nie treba było — usio sami:)».
Ciapier jana prachodzić lačeńnie, bo «zastudziła sustavy, dy i pazvanočnik dajecca ŭ znaki». «Pryščepki ja pakul nie rabiła, bo ŭ mianie niama sił zmahacca navat sa zvyčajnaj prastudaj: słaby imunitet, ja mocna schudnieła i słabaść maju», — piša Taćciana.
U ŠIZA joj paviedamili, što jana maje status «złośnika» (złosnaha parušalnika), heta maje niehatyŭnyja nastupstvy: Taćcianu abmiežavali ŭ hrašach na «atavarku», i «pluški, jakija buduć razdavać, mianie nie buduć tyčycca», piša jana. Dadatkova žančynu pazbavili doŭhaterminovaha spatkańnia.
«Praca mnie nie padabajecca, ale admova — heta adrazu ŠIZA. Tamu nie chaču nikomu davać nahody — chadžu na pracu, šyju. Kalektyŭ u nas žanočy, družny, šmat roznych ludziej, jość, viadoma, i narmalnyja», — zaznačaje asudžanaja.
Infarmacyju jana atrymlivaje ź biełaruskaha telebačańnia. «Ale ja ŭmieju bačyć i čuć praŭdu. I jana strašnaja», — napisała Taćciana.
Taćciana Kanieŭskaja — adna ź lidarak kampanii «Maci 328», jakaja zmahałasia suprać praciahłych terminaŭ dla zatrymanych pavodle narkatyčnych artykułaŭ. U 2020 hodzie była davieranaj asobaj Śviatłany Cichanoŭskaj. 8 žniŭnia 2020 hoda, napiaredadni vybaraŭ, jaje zatrymała milicyja. Z taje pary žančyna ŭ viaźnicy.
Uviesnu 2021 hoda sud pakaraŭ Taćcianu šaściu hadami pazbaŭleńnia voli za «masavyja biesparadki».
Taćciana maje čatyroch synoŭ. Małodšamu Hieorhiju — 14 hadoŭ. Uviesnu 2021 hoda siamju napatkała jašče adna biada — Dźmitryja Kanieŭskaha, syna palitźniavolenaj, pasadzili na try hady za niehatyŭny dopis pra milicyju ŭ Telegram.
Ciapier druhi syn Kanieŭskaj, Alaksiej, adbyvaje 30-dzionny aryšt. Jaho zatrymali za masku z nadpisam «čiestnyje ludi», abvinavacili ŭ «praviadzieńni niesankcyjanavanaha pikieta» i dali 15 sutak. Ale paśla adbytaha terminu Alaksiej nie vyjšaŭ na volu. Rodnyja daviedalisia, što jon atrymaŭ jašče 15 sutak ź nieviadomaj pryčyny.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami15
Kamientary