Ministerstva achovy zdaroŭja Biełarusi nie maje namieru ŭvodzić zabaronu na vyjezd žycharoŭ krainy ŭ Vialikabrytaniju z‑za virusa hrypu A/N1N1.
Pra heta paviedamiła siońnia žurnalistam namieśnik ministra achovy zdaroŭja — hałoŭny dziaržaŭny sanitarny ŭrač Valancina Kačan.
«Siońnia niama padstaŭ uvodzić zabaronu na vyjezd u Vialikabrytaniju. Adnak my rekamiendujem adkłaści pajezdki ŭ nienadziejnyja pa hrypu A/N1N1 krainy», — skazała Valancina Kačan.
Kamientujučy situacyju ŭ Vialikabrytanii, kali virus hrypu A/N1N1 raspaŭsiudžvajecca chutkimi tempami, Valancina Kačan adznačyła, što Ministerstva achovy zdaroŭja sumiesna ź Ministerstvam adukacyi i departamientam pa humanitarnaj dziejnaści ŭdakładnili śpisy biełaruskich dziaciej, jakija viarnulisia z hetaj krainy i jakija jašče znachodziacca tam na azdaraŭleńni. «U abaviazkovym paradku ŭsie, chto viarnuŭsia z‑za miažy, prachodziać termamietryju. U vypadku pavyšeńnia tempieratury cieła takija ludzi abśledujucca, izalujucca i ahladajucca ŭračami.
Ciapier u Biełarusi niama nivodnaha łabaratorna paćvierdžanaha vypadku zachvorvańnia na virus hrypu A/N1N1», — padkreśliła hałoŭny dziaržaŭny sanitarny ŭrač.
Situacyja z zachvaralnaściu na hryp A/N1N1 u śviecie śviedčyć ab nizkaj intensiŭnaści raspaŭsiudžvańnia hetaha virusa. Zachvorvańnie prachodzić u bolšaści vypadkaŭ u lohkaj formie abo siaredniaj ciažkaści, što možna lačyć doma, dastupnymi lekavymi preparatami. U toj ža čas namieśnik ministra achovy zdaroŭja nie vyklučyła taho, što virus hrypu A/N1N1 całkam moža źjavicca i ŭ Biełarusi. «Naša zadača ciapier zabiaśpiečyć hatoŭnaść usich słužbaŭ, kab jak maha chutčej jaho łakalizavać», — dadała Valancina Kačan.‑
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami10
Kamientary