Krušeńnie Su-27: viersii i tajamnicy

Kamientatar asprečvaje aficyjnuju viersiju ab pryčynach padzieńnia biełaruskaha Su‑27 u Radamie i nie vyklučaje mahčymaść dyviersii.

Ni rasšyfroŭki bartavych samapiscaŭ, ni apošniaha efiru piłotaŭ, ni peŭnych śviedak, ni pracy kamisii, ni ekśpiertyzy, a ŭ Ministerstva abarony ŭžo hatovy adkaz — ptuška!

Su-27 — źniščalnik-pierachvatčyk, jon stvorany dla boju, dzie imaviernyja lubyja pieraškody.

Nie toje što ptuški, a mietaličnyja askiepki — ažno suprać takoha zakładzieny raźlik. U Su-27 dva ruchaviki, i niachaj adzin navat całkam budzie źniščany — na druhim možna sieści.

Darečy, na lubych lotniščach pracuje abstalavańnie, što adpužvaje ptušak na mnoha kiłamietraŭ navokał.

Sam ruchavik — AŁ-31F — maje try kanały padačy pavietra i dadatkovy kampresar, jaki nahniataje cisk na starcie i na małych chutkaściach. Choć by ŭ pavietrazabornik patrapiŭ vatnik z valonkami — heta nie spyniła b ruchavik. Dla Su-27 nie isnuje paniatku «nialotnaje nadvorje». Piasčanaja bura, hrad, zaleva, zavieja — jon budzie pracavać!

Fihura piłatažu ŭžo była zavieršanaja, vykananaja, mašyna pajšła na adlot, kali na vyšyni kala 300 m ruchaviki zahłuchli albo rezka zbavili ciahu. «Prapaŭ huk», sa słovaŭ śviedak. Kali b u ruchavik patrapiŭ niejki pradmiet, ruchavik zahareŭsia b, pusciŭ dyma, zaroŭ. Druhi ruchavik imhnienna aŭtamatyčna ŭziaŭ by na siabie ciahu, šuhanuŭ by farsažny chvost.

Pa tym, jak imkliva ŭpaŭ samalot, pa tym, što jon nie hudzieŭ nadryŭna, nie hublaŭ kursu, nie zavalvaŭsia ŭ kren (što charakterna pry paškodžańni adnoha ruchavika), možna mierkavać, što spynilisia ci rezka stracili ciahu sinchronna abodva ruchaviki.

Pryčynaj takoha moža być albo admova sistemy kiravańnia ruchavikami (pryvadaŭ, elektroniki, aŭtamatyki), albo spynieńnie elektrasiłkavańnia ruchavika. Pieršaje mieniej imaviernaje za druhoje. Druhoje pa plačy hipatetyčnamu złamyśniku.

Za dźvie siekundy da padzieńnia (heta bolej, čym dastatkova) adstrelilisia «lichtary» (kaŭpaki kabinaŭ), ale katapultavańnia nie adbyłosia.

Jak vyhladaje, piłoty štatna, prafiesijna, jak i naležyć majstram takoha ŭzroŭniu, adpracavali avaryjnuju situacyju z zapasam času dla katapultavańnia. Nie spracavała ratavalnaja aŭtamatyka?

Samalot upaŭ, možna skazać žorstka sieŭ, ale zahareŭsia tolki praź niekalki dziesiatkaŭ siekundaŭ. Z hetaha stanovišča, pakul nie padchapiŭsia ahoń, taksama mahčymaje katapultavańnie! Čamu jano nie adbyłosia chacia b na ziamli?

Našy piłoty, jak vyhladaje, i fihuru vykanali akuratna, i samalot bieź ciahi adviali za les, i čas na evakuacyju vykraili z zapasam. Ale?

Darečy, pad Lvovam, u časie anałahičnaha incydentu, piłoty katapultavalisia paśla pieršaha ŭdaru samalota ab ziamlu, kali ŭžo ničoha nikudy nielha było adviesci.

Vystup biełaruskich vajskovych piłotaŭ u krainie NATO mieŭsia stać peŭnym hieapalityčnym sihnałam.

Ja b nie vyklučaŭ tut mahčymaść dyversii — možacie ličyć heta prystupam rusafobii, ale łahičnaja suviaź naprošvajecca sama.

Viersija hieraičnaha achviaravańnia žyćciom pryhožaja da ślozaŭ. Ale pafasnyja pramovy mohuć zachinuć vykryćcio sapraŭdnych abstavinaŭ.

Spadziajusia, mižnarodny skład kamisii ŭharantuje praŭdzivaje rasśledavańnie.

• 0
• 0
• 0
• 0
• 0
• 0
• 0
• 0