Źjaviłasia kalekcyja ŭpryhažeńniaŭ, hrošy ad prodažu jakoj pojduć na padtrymku palitviaźniaŭ
Kamanda prajekta Politvyazynka zapuściła kalekcyju aksiesuaraŭ, usie srodki ad prodažu jakoj pojduć na dapamohu žančynam, asudžanym pa palityčnych artykułach.
«Padčas paŭstańnia Kalinoŭskaha padrymka palitźniavolenych vyjaŭlałasia i ŭ modzie. Žančyny ŭ padtrymku palitviaźniaŭ nasili žałobnaje adzieńnie, a jašče źjaviłasia cełaja linija ŭpryhažeńniaŭ: branzalety z sercam i jakaram, zavušnicy, karali, piarścionki, broški», — raskazvaje Jaŭhienija Doŭhaja, stvaralnica inicyjatyvy «Palitviazynka».
Daviedaŭšysia pra hety fakt, znajomaja dyzajnierka dziaŭčyny, jakaja taksama paciarpieła ad palityčnych represij, prapanavała zrabić padobnuju kalekcyju. Aktyvistka kaža, što značna dapamahli ŭ hetym artykuły žurnalista Alesia Kirkieviča i historyka Vasila Hierasimčyka, abodva šmat pisali pra paŭstańnie Kalinoŭskaha, i partniorki natchnialisia apisanymi tam historyjami.
Za asnovu materyjałaŭ uziali mietał i žemčuh. Jaŭhienija dzielicca: «Ź mietałam źviazana mnohaje turemnaje — kraty, kajdanki. A žamčužyny — heta pra niešta dalikatnaje i pryhožaje».
Usie vyraby vykananyja ŭručnuju i niasuć hłyboki sens. Kali pryhledziecca da niekatorych upryhožańniaŭ, naprykład, da žamčužnaha čokiera, možna razhladzieć, što pacierki na im raźmieščanyja pavodle azbuki Morze i składajucca ŭ nadpis «Žyvie Biełaruś».
Pryciahvajuć uvahu i zavušnicy «Ciulpany» — dziaŭčaty zrabili ich jak pamiać ab žanočych akcyjach salidarnaści, jakija prachodzili ŭ Minsku ŭ 2020 hodzie. Ale, tak jak kalekcyja adlustroŭvaje biełaruskuju rečaisnaść, było vyrašana dadać niezvyčajnyja zašpilki, jakija nahadvajuć kajdanki.
Akramia taho, u kalekcyi jość raznastajnyja branzalety i kalje. Usie srodki ad prodažu aksiesuaraŭ buduć nakiravanyja na dapamohu palitźniavolennym žančynam.
Jaŭhienija i jaje kamanda farmirujuć banderoli dla tych, chto znachodzicca ŭ kałonijach, SIZA ci adbyvaje termin na «chimii». Žančynam pieradajuć bializnu i srodki hihijeny: asablivaj papularnaściu karystajucca hieli dla duša i šampuni ad vošaj. Akramia taho, u dapamohu ŭvachodziać i miedycynskija preparaty: srodki ad hałaŭnoha bolu i prastudy, mazi ad hiemaroju. Pry nieabchodnaści kamuści sa źniavolenych kuplajecca adzieńnie i abutak.
Pa mahčymaści padtrymka akazvajecca i žančynam, jakija adbyli svoj termin. Im dapamahajuć finansava — dajuć nievialikuju sumu ŭ 50-100 dalaraŭ na apłatu hiniekołaha, stamatołaha, nabyćcio praduktaŭ ci pakryćcio vydatkaŭ na hurtki dziaciej.
Nabyć upryhažeńni možna ŭ instahramie prajekta. Dla zručnaści pakupnikoŭ dziaŭčaty arhanizavali mižnarodnuju dastaŭku.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami14
Kamientary
niekali ja pisała typu "azbukaj Morze" )