Taćcianu Martynavu źniali ź ciahnika na polskaj miažy i zabaranili ŭjezd u ES na 10 hadoŭ

Člena Kaardynacyjnaj rady Taćcianu Martynavu zatrymali pry pierasiačeńni polska-ŭkrainskaj miažy. Joj anulavali šenhienskuju vizu i zabaranili ŭjezd u krainy Jeŭrapiejskaha sajuza terminam na 10 hadoŭ.

Pra heta Taćciana Martynava raskazała «Našaj Nivie».

Pavodle jaje słoŭ, incydent adbyŭsia ŭ ciahniku, jaki jechaŭ z Kijeva ŭ Polšču.

— Polskija pamiežniki padčas pravierki dakumientaŭ i adbitkaŭ palcaŭ skazali, što ja pavinna pierasiakać miažu praź inšy punkt propusku. Paśla mianie źniali ź ciahnika razam z rečami i advieźli na aŭtamabilny pamiežny pierachod. Tam paviedamili, što maja šenhienskaja viza anulujecca, mianie čakaje departacyja i zabarona na ŭjezd u ES na dziesiać hadoŭ, — raspaviała Taćciana Martynava.

Na momant razmovy jana znachodziłasia na polskim baku miažy i čakała afarmleńnia dakumientaŭ.

— Zaraz ja na polskim pierachodzie, čakaju pratakoł. Nichto ničoha nie tłumačyć, niama nijakaj infarmacyi, sa mnoj faktyčna nichto nie razmaŭlaje. Skazali tolki, što departacyja budzie nie ŭ Biełaruś. I na tym dziakuj, — kaža jana.

Taćciana Martynava adznačaje, što maje ŭkrainski dazvoł na žycharstva, tamu płanuje viarnucca va Ukrainu.

— Miarkuju, mianie paviazuć nazad na ŭkrainskuju miažu. Budu vyklikać taksi i jechać u Kijeŭ. Ale ja jechała ŭ Varšavu, u mianie tam svaje spravy, svaje płany… I što ciapier rabić — ja prosta nie viedaju.

Martynava padkreślivaje, što raniej nie mieła prablem ź pierasiačeńniem miežaŭ krain Jeŭrasajuza.

— Apošni raz ja pierasiakała miažu ES letaś. Uvieś hety čas znachodziłasia va Ukrainie. U mianie niama nivodnaha štrafu, nijakich parušeńniaŭ na terytoryi ES. Tamu absalutna niezrazumieła, adkul viecier dźmie.

Pavodle jaje słoŭ, pryčynu rašeńnia polski bok pakul nie ahučyŭ.

— Chutčej za ŭsio, u pratakole taksama nie budzie paznačanaja pryčyna zabarony na ŭjezd. Ale ja budu abskardžvać hetaje rašeńnie i padavać apielacyju.

Taćciana Martynava pryznajecca, što ŭpieršyniu apynułasia ŭ padobnaj situacyi.

— Kali ŭ ciabie biełaruski pašpart, žyćcio pieratvarajecca ŭ piekła. U nas niama svajoj krainy, my z vami mižnarodnyja bamžy. Upieršyniu ŭ žyćci ja trapiła ŭ situacyju, kali nie razumieju, što adbyvajecca i što mnie rabić dalej.

Taćciana Martynava — byłaja viadučaja ANT, błohierka i zasnavalnica hramadzianskaj inicyjatyvy «Chopić bajacca». Biełaruś jana pakinuła ŭ lipieni 2020 hoda i apošnija hady žyvie va Ukrainie. U 2024‑m i 2026‑m hadach Martynava ŭdzielničała ŭ vybarach u Kaardynacyjnuju radu jak lidarka śpisu «Chopić bajacca!», a siońnia viadzie ŭłasnyja miedyjnyja prajekty i rehularna kamientuje biełaruskija i ŭkrainskija palityčnyja padziei.

• 23
• 2
• 22
• 22
• 22
• 3
• 18
• 0