Bajkovu pieraviali pad chatni aryšt

Paśla ŭčarašniaj sustrečy z Łukašenkam Hienprakuror admoviŭsia praciahvać termin utrymańnia pad vartaj. Śledčy Hienprakuratury Śviatłana Bajkova, zatrymanaja 25 lutaha, pieraviedziena pad chatni aryšt, paviedamiŭ jaje advakat Michaił Vołčak.

«Hienieralnym prakuroram Respubliki Biełaruś admoŭlena ŭ praciahu terminu ŭtrymańnia pad vartaj Bajkovaj S. A. Ciapier jana znachodzicca doma: śledstvam abrana miera strymańnia — chatni aryšt.

Bajkova była aryštavana ranicaj 25 lutaha na pracoŭnym miescy pa padazreńni ŭ pieravyšeńni ŭłady.

U kancy krasavika, paśla zakančeńnia dvuch miesiacaŭ z momantu jaje zatrymańnia, hienprakuror Ryhor Vasilevič admoviŭsia praciahvać termin utrymańnia svajoj padnačalenaj. Paśla hetaha KDB raspačaŭ u dačynieńni da Bajkovaj druhuju kryminalnuju spravu, termin rasśledavańnia jakoj zaviaršaŭsia 24 červienia.

U dačynieńni da Bajkovaj raspačatyja spravy pa art. 399 (niezakonnaje vyzvaleńnie ad kryminalnaj adkaznaści) i art. 426 (pieravyšeńnie ŭłady abo słužbovych paŭnamoctvaŭ) Kryminalnaha kodeksa. Uvieś hety čas śledčy znachodziłasia ŭ śledčym izalatary KDB.

31 maja Bajkova abjaviła haładoŭku ŭ znak pratestu suprać vyłučanych joj abvinavačańniaŭ, ź jakoj vyjšła 16 červienia pa nastajańni daktaroŭ, svajakoŭ i abarony.

11 červienia ŭ Administracyju prezidenta Biełarusi było pieradadziena prašeńnie Bajkovaj na imia Alaksandra Łukašenki. U im zatrymanaja prasiła adnavić jaje parušanyja pravy i svabody, vyzvalić sa śledčaha izalatara KDB i dazvolić pradoŭžyć pracu.

Adnak 24 červienia hienprakuror praciahnuŭ termin utrymańnia Bajkovaj pad vartaj jašče na dva miesiacy.

U pačatku žniŭnia stała viadoma, što Bajkova znachodzicca ŭ krytyčnym stanie, u jaje raźviłasia nyračnaja niedastatkovaść, u suviazi z čym zatrymanaja prachodziła abśledavańnie ŭ špitali KDB.

Treba adznačyć, što 24 žniŭnia, u dzień, kali musiŭ rašacca dalejšy los Bajkovaj, Alaksandr Łukašenka pryniaŭ z dakładam Ryhora Vasileviča. Jak paviedamiła pres-słužba prezidenta, Łukašenka zajaviŭ pra nieabchodnaść bolš uzvažana padychodzić da pryznačeńnia pakarańniaŭ, źviazanych z pazbaŭleńniem voli.

U filmie NTV «Chrosny baćka» były načalnik Upraŭleńnia MUS pa baraćbie z karupcyjaj kapitan Viačasłaŭ Dudkin, jaki zmušany byŭ uciačy z krainy paśla taho jak byli spynieny rasśledavańni karupcyjnych złačynstvaŭ z udziełam najvyšejšych čynoŭnikaŭ, vykazvaje mierkavańnie, što Bajkovu aryštavali, bo jana ŭ svaim rasśledavańni vyjšła na struktury, blizkija da niekatorych najvyšejšych kiraŭnikoŭ krainy abo ichnych siamiejnikaŭ.

• 0
• 0
• 0
• 0
• 0
• 0
• 0
• 0