Prakapovič sumniajecca

Nacyjanalny bank Biełarusi sumniavajecca ŭ mahčymaści realizacyi zakładzienaj u prajekt Nacyjanalnaj prahramy raźvićcia ekspartu na 2011–2015 hady zadačy pa vychadzie na stanoŭčaje salda źniešniaha handlu da kanca piacihodki.

Pra heta zajaviŭ staršynia praŭleńnia Nacyjanalnaha banka Biełarusi Piotr Prakapovič 8 lutaha na pasiadžeńni prezidyuma Saŭmina, na jakim razhladaŭsia prajekt hetaj prahramy.

Sioleta temp rost ekspartu pavinien skłaści 115,9%, a impartu — 115,8%, roźnica 0,1%. Ekspart i impart rastuć adnolkavymi tempami», — padkreśliŭ Prakapovič, źviartajučysia da kiraŭnika MZS Siarhieja Martynava. — Dzie harantyi, što nie budzie toje, što i raniej? U prahramie minułaj piacihodki my płanavali rost tempu ekspartu nad impartam, a ŭ ciapierašniaj prahramie my hetaha nie płanujem, pačynajučy ź pieršaha hoda realizacyi».

U svaju čarhu Martynaŭ padkreśliŭ, što,

pačynajučy z 2011 hoda, realizavać usiu prahramu niemahčyma.

Jon dadaŭ, što ŭ prahramie zakładziena pastupovaje apiaredžańnie tempu rostu ekspartu nad impartam. Taksama jon adznačyŭ, što prahramaj praduhledžany ŭvod u tym liku stymulujučych miechanizmaŭ realizacyi ekspartnaj stratehii. «Kali jany buduć uviedzieny i dziejničać, prahrama budzie vykonvacca», — ličyć ministr.

Pavodle słoŭ Martynava, ź viedamstvami i rehijonami ŭzhodnieny prahnoznyja pakazčyki pa roście ekspartu, zakładzienyja ŭ prahramie. Razam z tym «nie ŭsie paćvierdzili hatoŭnaść vyjści na hetyja paramietry». U pryvatnaści, kancern «Biełbijafarm» hatovy pavialičyć ekspart farmaceŭtyčnaj pradukcyi za piacihodku ŭ 2,5 razu, u toj čas jak u prajekcie prahramy vyznačana pavieličeńnie ŭ čatyry razy. «Kancern paćvierdziŭ hatoŭnaść zabiaśpiečyć vykanańnie zadańnia pry ŭmovie hatoŭnaści miascovych orhanaŭ ułady padklučycca da hetaj pracy», — adznačyŭ kiraŭnik MZS. Pavodle jaho słoŭ, takaja ž karcina nazirajecca pa šerahu inšych viedamstvaŭ. Tak, Minsielhascharč uzhadniŭ pavieličeńnie abjomaŭ ekspartu ŭ 2,2 razu, a ŭ prahramie zakładziena pavieličeńnie ŭ try razy. Dla Minsportu zakładzieny rost ekspartu ŭ 3,5 razu, a jano hatova pavialičyć u dva razy.

Martynaŭ padkreśliŭ, što, mahčyma, spatrebicca karekciroŭka pakazčykaŭ i pa inšych halinach

— paśla pryniaćcia rašeńnia ŭradam ab uniasieńni źmianieńniaŭ u pastanovu Saŭmina ad 30 vieraśnia 2010 hoda № 1419, jakim ustanoŭleny pakazčyki pa źniešniehandlovamu salda. «Adpaviedny prajekt uniesieny Minekanomiki va ŭrad, ale rašeńnie pakul nie pryniata», — skazaŭ Martynaŭ.

Nahadajem, admoŭnaje salda źniešniaha handlu tavarami ŭ 2010 hodzie pieravysiła 9,6 młrd. dołaraŭ ZŠA.

• 0
• 0
• 0
• 0
• 0
• 0
• 0
• 0