Vajciuškievič zabaronieny ŭ Bieraści

Śledam za kancertam «Lapisa Trubiackoha» ŭ Homieli raptoŭna admienieny vystup jašče adnaho fihuranta «čornaha» śpisa. Nie adbudziecca solny kancert Źmitra Vajciuškieviča u bieraściejskim Teatry lalek, niahledziačy na toje, što jaho praviadzieńnie było całkam uzhodniena ź miascovymi ŭładami.

«Bačna, što «čorny śpis» realna dziejničaje, heta nie falšyŭka, jak skazaŭ ministr Pralaskoŭski. Prykra, što naša kraina zastajecca pravincyjnaj i viartajecca ŭ siaredniaviečča», — zajaviŭ śpiavak.

Jak kaža arhanizatar vystupa Vajciuškieviča ŭ Bieraści Źmicier Nazaraŭ, na imprezie 18 sakavika moh być anšlah. «Takoha ažyjatažu na kvitki biełaruskaha vykanaŭcy ŭ nas nie było daŭno. Tolki ŭ pieršy dzień zamovili pad 200 kvitkoŭ», — kaža Źmicier. Ale raptam jaho vyklikaŭ da siabie dyrektar teatru Michaił Šaviel i paprasiŭ admianić kancert, biez tłumačeńnia pryčynaŭ. «U teatry tolki vitali ideju praviadzieńnia imprezy, durniami ich vystavili haradskija ideolahi, — kaža arhanizatar. — Choć u samim adździele idealohii harvykankamu mnie skazali raniej, što ličać „čornyja“ śpisy łuchtoj i navat pastavili piačatku na afišu Vajciuškieviča. Im lahčej nie brać na siabie adkaznaść za admienu — lepiej nacisnuć na dyrektara DK ci teatra».

«Sumna, što my znoŭ viartajemsia da zabaronaŭ.

Bačna, što „čorny“ śpis realna dziejničaje, heta nie hniusnaja falšyŭka, jak skazaŭ ministr Pralaskoŭski.

Prykra, što naša kraina zastajecca pravincyjnaj i viartajecca ŭ siaredniaviečča. U suviazi z zabaronaj kancertu viadziecca navat nie pra finansavyja straty, kolki pra maralnyja. Usio ž chaciełasia, kab u nia nadta biełaruskamoŭnym Bieraści prahučała biełaruskaje słova. Kaniečnie, ruki nie składaju ŭ suviazi ź pieraškodami. Budziem dziejničać pa-inšamu, vykručvacca, jak zmožam, vydumlać dy ŭhavorvać, šmathadovy dośvied u hetym ja ŭžo maju», — tak prakamentavaŭ sytuacyju sam Źmicier Vajciuškievič.

Pakul biełaruskim vykanaŭcam pieraškadžajuć vystupać tolki ŭ rehijonach.

U stalicy ŭ hetym planie usio spakojna. Paśla taho, jak źjaviłasia infarmacyja pra viartańnie «čornaha» śpisu, tut paśpiachova prajšoŭ kancert taho ž Vajciuškieviča na 8 sakavika. Nijakich niehatyŭnych sihnałaŭ nie atrymali i arhanizatary budučych kancertaŭ inšych fihurantaŭ taho śpisa — hurtoŭ Neuro Dubel i «Lapis Trubiackoj».

Pa nieaficyjnaj infarmacyi, śpis ź pieralikam niepažadanych vykanaŭcaŭ, aktoraŭ i piśmieńnikaŭ byŭ razasłany na pačatku sakavika ź inicyjatyvy Ministerstva infarmacyi i Administracyi prezidenta ŭ dziaržaŭnyja ŚMI i kulturnyja ustanovy krainy.

• 0
• 0
• 0
• 0
• 0
• 0
• 0
• 0