Pra siońniašniuju płastyčnuju chirurhiju «NN» raskazaŭ Aleh Stasievič, sakratar «Tavarystva płastyčnaj, rekanstrukcyjnaj i estetyčnaj chirurhii».
«Naša Niva»: Nakolki płastyčnaja chirurhija papularnaja ŭ Biełarusi? Ci mohuć prostyja biełarusy sabie heta dazvolić?
Aleh Stasievič: Da sakavika 2011 hoda heta było dastupna amal što ŭsim. Naprykład, adna pacyjentka, jakaja pavialičyła sabie hrudzi, pracavała kranaŭščycaj. Ciapier ja dumaju, što nie ŭsim. Choć ceny ŭ valucie ŭ paraŭnańni z tym samym sakavikom stali nižejšyja. Dla biełarusaŭ apieracyja stała ŭdvaja daražejšaj, a dla zamiežnikaŭ — tańniejšaj. Na siońnia pracy mienš nie stała, ale siarod pacyjentaŭ biełarusaŭ stała pamienieła.
«NN»: Ź jakich krainaŭ pryjazdžajuć klijenty?
AS: Z usiaho śvietu, navat z Novaj Ziełandyi. U asnoŭnym — Rasija, Ukraina, Hiermanija, SŠA, Izrail, Šviejcaryja. Ale jak praviła heta ludzi biełaruskaha pachodžańnia, biełaruski, što vyjšli za zamiežnikaŭ. Brakuje rekłamy Biełarusi jak krainy, inačaj zamiežnych klijentaŭ mahło b być bolš.
«NN»: Ci jość u našaj krainie najnoŭšyja technałohii ŭ halinie płastyčnaj chirurhii?
AS: Na siońnia ŭ Biełarusi dastupna praktyčna ŭsio. Kali jašče na pačatku hoda ŭ nas nie było frakcyjnych łazieraŭ, to ciapier i jany jość. Sioleta centry płastyčnaj chirurhii abstalavalisia vielmi dobra.
«NN»: Dzie, aproč stalicy, možna naviedać płastyčnaha chirurha?
AS: U lubym abłasnym centry, a taksama ŭ niekatorych nievialikich haradach. Naprykład, va Uździe, u Oršy.
«NN»: Jakija apieracyi samyja papularnyja?
AS: Pieršaje miesca ź vialikim adryvam zajmajuć amałodžvalnyja pracedury. Heta blefarapłastyka (padciažka paviekaŭ), injekcyi botaksu, łaziernyja pracedury, fejs-liftynh, padciažka skury šyi, uviadzieńnie pad skuru napaŭnialnikaŭ, lipafilinhi i hetak dalej. Usio heta vykarystoŭvajecca z metaj padmanuć čas i publiku nakont svajho ŭzrostu.
«NN»: Jak vy asabista staviciesia da takoha «padmanu» pryrody?
AS: Heta tendencyja času. Ciapier adnym ź sinonimaŭ pryhažości źjaŭlajecca maładość. Kažuć, małady — značycca pryhožy.
«NN»: Ci aznačaje heta, što ŭ pieršuju čarhu da vas źviartajucca publičnyja asoby: viadomyja viadučyja, artysty?
AS: Ja b nie skazaŭ, što heta tak. Dola «viadomych» asob siarod pacyjentaŭ takaja ž, jak i ŭ žyćci.
«NN»: Kolki hadoŭ možna «skinuć» paśla apieracyi?
AS: Usio zaležyć ad asablivaściaŭ kankretnaj asoby: najaŭnaści chraničnych zachvorvańniaŭ, užyvańnia tytuniu, što vielmi važna. Bolšaść ludziej razumiejuć škodnaść tytuniu tolki tady, kali sutykajucca ź miedycynaj, zaviazanaj na žyćciazdolnaści tkanak. Užyvańnie tytuniu značna pavialičvaje kolkaść uskładnieńniaŭ paśla apieracyi i vielmi mocna ŭpłyvaje na kančatkovy vynik. Ludzi, jakija nikoli nie ŭžyvali tytuniu, lepš vyhladajuć i da płastyčnaj chirurhii, i paśla jaje. Ciažka adkazać, «nakolki ja pamaładzieju». Čaściej za ŭsio paśla apieracyi ludzi vyhladajuć na svoj viek, ale bolš zdarovymi, pryvabnymi. Kštałtu «niejak ty paśviažeła, maja daražeńkaja». I nasamreč takuju metu stavić bolšaść našych pacyjentaŭ.
«NN»: Ź jakoha ŭzrostu možna rabić amałodžvalnyja pracedury?
AS: Zvyčajna prychodziać ludzi ad 40 i starejšyja. Choć heta zaležyć ad situacyi. Naprykład, było, što adnosna małady čałaviek mocna schudnieŭ, i ŭ jaho advisła skura. Samaj staroj majoj klijentcy było za 70 hadoŭ.
«NN»: Kolki kaštuje «maładość»? Naprykład, prybrać zmorščyny la vačej?
AS: Ad troch miljonaŭ i bolš. Košt pracedury frakcyjnaha łazieru — kala miljona rubloŭ (uvieś kurs uklučaje 6-7 pracedur).
«NN»: Jaki pracent niaŭdačy?
AS: Kožny płastyčny chirurh maje peŭny pracent dobrych i niaŭdałych vynikaŭ. Kali heta dobry chirurh — ich mienš. Kali nie vielmi daśviedčany ci nie vielmi achajny — bolš. Pracent niaŭdačy zaležyć ad vidu apieracyi. Dla rynapłastyki (płastyka nosa) heta 10-12%, chirurhii małočnaj załozy — 3-5%. Što da intymnaj płastyki, to ŭskładnieńniaŭ amal nie byvaje… Ale na siońnia płastyčnaja chirurhija, aproč miedycynskaj haliny, jašče i biznes. Tamu, pa zakonie rynka, chirurh, jaki zrabiŭ šmat uskładnieńniaŭ, raniej ci paźniej z rynku źniknie. Sam fakt, što čałaviek pracuje i pracuje za hrošy, śviedčyć, što jon zdolny zadavolić husty i zapatrabavańni kankretnaha čałavieka.
«NN»: Jakija inšyja pracedury płastyčnaj chirurhii karystajucca popytam?
AS: Pavieličeńnie hrudziej, płastyka vušej, nosa, lipasakcyja… Letaś vielmi papularnaj siarod žančyn stała intymnaja płastyka.
«NN»: U hetym hodzie ŭ internecie źjaviłasia «Suśvietnaja mapa pamieru hrudziej», pavodle jakoj samyja maleńkija hrudzi ŭ Jeŭropie akazalisia ŭ biełarusak. Vy zhodnyja z hetym?
AS: Ja b skazaŭ, biełaruski bajacca vialikich hrudziej. Dla ich pamier S ci D ličycca vialikim. U zachodniaj chirurhii hetyja pamiery nie ličacca vialikimi. Ale ciapier u nas nazirajecca tendencyja pavialičvać hrudzi da bolšych abjomaŭ.
«NN»: Ź jakoha ŭzrostu možna pavialičyć hrudzi?
AS: Pa rekamiendacyjach sustvietnaha prafiesijnaha abjadnańnia płastyčnych chirurhaŭ, takuju apieracyju varta rabić nie raniej za 21 hod. Heta nie tyčycca žančyn, jakija byli ciažarnymi, jakija majuć niejkija psichałahičnyja kompleksy ci vidavočnyja fizičnyja niedachopy (naprykład, jarka vyražanaja asimietryja hrudziej). U takich vypadkach možam zrabić apieracyju i bolš maładym.
«NN»: Ci možna karmić niemaŭla «štučnymi» hrudziami?
AS: Možna. Na karmleńnie apieracyja nijak nie ŭpłyvaje. Impłant raźmiaščajecca pad tkankaj załozy, a nie ŭnutry jaje.
«NN»: Kolki kaštuje takaja apieracyja?
AS: 8-12 miljonaŭ plus košt impłantaŭ ad 7 da 16 miljonaŭ za paru. Aproč pavieličeńnia jość inšyja vidy apieracyj: padciažka, źmianšeńnie hrudziej, u tym liku dla mužčyn.
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary