Vital Cyhankoŭ. Rabočy-niezaležnik

Rabočy-niezaležnik

Siarhiej Antončyk zaklikaje denansavać damovy z Rasiejaj i vyniki referendumaŭ

Kali ŭłady nie zarehistrujuć Paźniaka, jaki nia žyŭ u Biełarusi piać hadoŭ, samym niezaležnickim kandydatam moža stać rabočy lider Siarhiej Antončyk.

Vyłučeńnie Antončyka ŭžo vyklikała nehatyŭnuju reakcyju ŭ apazycyjnych kołach. Adzin hałoŭny redaktar, jaki dumaje, što tolki dziakujučy jamu narod jašče viedaje apazycyjnych lideraŭ, admoviŭsia dasłać svajho karespandenta na pres-kanferencyju Antončyka, zajaviŭšy, što vyłučeńnie Antončyka idzie tolki na škodu.

Kamu ž vyhadny ŭdzieł Antončyka?

Sacyjalahičnaja słužba NISEPD vyłučyła try asnoŭnyja “varyjanty”, jakija mohuć pieramahčy Łukašenku. Heta, umoŭna kažučy, «pramaskoŭski kandydat», «namenklaturny kandydat» i «narodny». Antončyk choča zhulać u toj samy «narodny» varyjant, jaki vykarystaŭ Łukašenka ŭ 1994 h. Varta, praŭda, dadać, što ŭsie sacyjalahičnyja raskładki časam raźbivajucca čyńnikam, jaki nie praličyš – vyraznaściu asoby palityka, jahonymi jarkimi ŭčynkami.

«Narodnamu» varyjantu sacyjolahi, darečy, addajuć najmienšuju vierahodnaść pieramohi. Adnak niša Antončyka jakraz tut. “Revalucyja masaŭ” u Biełarusi nie zakončanaja, i mnohija pa-raniejšamu hatovyja vybirać “svajho chłopca”, “nie z namenklatury”. Łukašenka razumieje heta, i ŭvieś čas padkreślivaje svaju adstaronienaść ad čynavienstva, rehularna sadžajučy ŭ turmu niekatorych i publična “pieratrachvajučy” na selektarnych naradach usich astatnich. Jon taksama zmahajecca za samuju vyhadnuju nišu “niezaležnaha” kandydata.

Kali b demakratyčnaja palityčnaja elita ź niejkich małazrazumiełych mnie pryčynaŭ nie adšturchoŭvała Antončyka na praciahu ŭsich hetych hadoŭ, kali b napracavany im dośvied i ŭmieńnie vystupać byli padtrymanyja ŭsimi resursami demakratyčnych siłaŭ, mahčyma, jon by siońnia moh być samym realnym alternatyŭnym kandydatam. Tym samym biełaruskim Valensam, paraŭnańnie ź jakim tak i naprošvajecca. Adnak hetaj padtrymki niama, i, zrazumieła, u bližejšyja miesiacy ničoha nia źmienicca.

Najhoršaje, što mohuć zrabić zaraz demakratyčnyja siły, – heta supraćstajać vyłučeńniu Antončyka, dumajučy, što jon raściarušvaje apazycyjnych vybarščykaŭ. Heta niasłušnaje mierkavańnie. Za kaho, pa-vašamu, prahałasujuć rabočyja? Za Hančaryka? Značnaja častka (kali nia bolšaść) rabočych nienavidzić ci, u lepšym vypadku, nia lubić aficyjnych prafsajuzaŭ. Akramia apošniaha hodu, kali ŭsie pačali dumać pra vybary, FPB i nie namiakała na niejkaje procistajańnie ŭładzie. Na bolšaści pradpryjemstvaŭ prafsajuzy ŭ adnoj źviazcy z dyrektaratam zmahalisia suprać niezaležnych prafsajuzaŭ i asobnych palityčna aktyŭnych rabočych. A moža paŭtara miljony rabočych addaduć svaje hałasy za “bankira” Čyhira?

Reč u tym, što ludzi ŭ nas hałasujuć iracyjanalna, pavodle pryncypu «padabajecca — nie padabajecca». I niachaj jany sto razoŭ buduć suprać Łukašenki, ale, kali «adziny kandydat» hetamu kankretnamu vybarščyku budzie čymści nie daspadoby, jon vykraślić i Łukašenku, i «adzinaha» abo zusim nia pojdzie na vybary.

U Antončyka na siońnia svaje specyfičnyja vybarcy. Toje, što jon nie adbiare hałasoŭ u demakratyčnych kandydataŭ, uskosna moža paćvierdzić i apytańnie «Našaj Nivy», u jakim jahonaje imia ŭzhadvałasia tolki adnojčy. Zadača apazycyi — pryvieści na vybary tyja 40% biełarusaŭ, jakija ŭžo vyrašyli nie hałasavać za Łukašenku, ale jašče nie hatovyja, i moža, nia buduć hatovyja addać svoj hołas za adzinaha kandydata. Takim ludziam patrebnaja alternatyva. Antončyk moža joju być.

Vital Cyhankoŭ