Samyja cikavyja padziei ŭ Opery adbyvajucca tady, kali asnoŭnaja častka trupy źjaždžaje na hastroli. Voś i sioleta: ledźvie teatar vypraviŭsia ŭ Niamieččynu, jak 12 červienia ŭ budynku na Trajeckaj hary adbyŭsia kancert «Maładyja hałasy Biełaruskaj opery».
Maładość u mastactvie — heta stan, kali aktor ci śpiavak jašče čakaje na svaje hałoŭnyja roli. U hetkim sensie maładymi apynulisia daloka nia ŭsie ŭdzielniki kancertu.
37-hadovaja Viktoryja Kurbackaja debiutavała ŭ 1991 h. Siońnia jana śpiavaje amal usie sapranavyja partyi pieršaha planu. Padčas kancertu Kurbackaja zaśpiavała zmročnuju aryju Leanory z «Trubaduru» Verdzi i hracyjozny mocartaŭski duet Cerliny i Don Žuana. U aryi jana znarok rabiła hołas ciažejšym, dziela bolšaha dramatyzmu. Zatoje Mocarta śpiavała ŭ čverć siły, kab prystasavacca da ścipłych mahčymaściaŭ svajho partnera — barytona Ŭładzimiera Hromava. Možna spadziavacca, što z časam i jon zdoleje zapoŭnić svaim hołasam prastoru opernaje zali. I tady jaho muzyčnaść, artystyzm, praniknionaść śpievu buduć naležnym čynam acenienyja.
37-hadovaja Alena Bundzieleva zaśpiavała ŭ scenie z «Pajacaŭ» z barytonam Alaksandram Krasnadubskim. Pobač ź im spn.Bundzielevaj nie było čuvać. Hołas Krasnadubskaha — mocny, vyrazny i ciopły — calaŭ prosta ŭ sercy. Škada, što hetaha śpievaka niedastatkova vykarystoŭvajuć u operach Verdzi i Pučyni.
Mecca-saprana Elvira Ryžanovič śpiavała aryju Karmen, što prahučała ŭ jaje vykanańni nia duža pierakanaŭča. Taja rola bolš pasavała b maładzieńkaj Volzie Kažhalijevaj, u jakoj nadzvyčajny hołas — sakavity, tembrysty, palotny, amal bieź vibrata. U Opery bahata talenavitych mecca-saprana. Aprača Kažhalijevaj, u kancercie ŭdzielničali Alena Sało i Aksana Jakuševič. Sało, da niadaŭniaha času bolš viadomaja jak vykanaŭca narodnych piesień i duchoŭnaj muzyki, razam z Krasnadubskim zaśpiavała duet Raziny j Fihara. Pryhoža, choć i krychu «zastaranna», akademična. Aksanu Jakuševič my zusim niadaŭna bačyli ŭ roli Marfy na premjery «Chavanščyny». Na «Maładych hałasoch» jana zaśpiavała pieśniu Azučeny z «Trubadura». Musarhskaha Aksana vykonvała jak studentka, Verdzi — jak majstar. Dla jaje pałkaha temperamentu muzyka Verdzi — rodnaja stychija. Musarhski — čužaja.
Hołas Taciany Haŭryłavaj, pryhoža afarbavany, zvonki, z nadzvyčaj pieknymi vierchnimi notami, jaje vytančanaje majsterstva śpievu, intelihientnaść i tonkaść interpretacyi vielmi prydalisia ŭ aryi Raziny z «Sevilskaha cyrulnika». Zrabiła ŭražańnie j pryhožaje liryčnaje saprana Nastaśsi Maskvinoj. Ale joj nie zaŭždy staje prafesijanalizmu.
Abodva basy, što ŭdzielničali ŭ kancercie, taksama vybrali dla vykanańnia rasiejskuju muzyku: bolš daśviedčany Źmicier Kapiłaŭ zaśpiavaŭ aryju Mielnika z opery Darhamyžskaha «Rusałka», sudent Andrej Kulinkovič — aryju Aleka z adnajmiennaj opery Rachmaninava, skarystaŭšy cudoŭnuju nahodu pakazać usiu pryhažość svajho aksamitnaha hołasu.
U Opery jość šmatabiacalnyja hałasy, najpierš žanočyja, ale niama maładoha tenara, hatovaha ŭziać na svaje plečy ŭvieś ciažar biahučaha repertuaru. Pryčyny varta šukać u Akademii muzyki. Bo heta adzinaja navučalnaja ŭstanova, jakaja rychtuje śpievakoŭ dla hałoŭnaha teatru krainy.
JUA
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary