АГП хоча сумясціць чарговую акцыю прадпрымальнікаў з «сацыяльным маршам». Шумчанка: Нам пасажыры не патрэбныя
Аб'яднаная грамадзянская партыя (АГП) падала ў Мінгарвыканкам заяўку на правядзенне 14 сакавіка ў Мінску «Сацыяльнага маршу за годнае жыццё».
Гэта акцыя анансавалася падчас мітынгу індывідуальных прадпрымальнікаў, які прайшоў у цэнтры Мінска 28 лютага.
Як паведаміў БелаПАН старшыня АГП Анатоль Лябедзька, заяўка ў гарвыканкам пададзена 29 лютага. Лідар АГП удакладніў, што час і месца збору, а таксама маршрут шэсця цалкам супадаюць з часам і месцам правядзення маршу прадпрымальнікаў, запланаванага на 14 сакавіка. Заяўка на марш прадпрымальнікаў была пададзена на мінулым тыдні экс-палітвязнем Мікалаем Статкевічам і лідарам РГА «Перспектыва» Анатолем Шумчанкам. У ёй пазначана, што шэсце плануецца правесці з 13.00 да 16.00 ад Акадэміі навук па вуліцах Сурганава і Арлоўскай да парку Дружбы Народаў.
Паводле слоў Лябедзькі, розніца паміж двума заяўкамі толькі ў тым, што актывісты АГП пакуль не плануюць праводзіць мітынг на плошчы Бангалор. Правядзенне двух маршаў у адзін і той ж час палітык растлумачыў неабходнасцю кансалідацыі грамадства. «Сёння ёсць усе падставы, каб аб'ядноўваць намаганні. Не толькі індывідуальныя прадпрымальнікі, але і студэнты, і пенсіянеры сталі заложнікамі той эканамічнай палітыкі, якую праводзяць улады», — заявіў ён.
Шумчанка, са свайго боку, звярнуў увагу на тое, што з прапановай аб'яднаць дзве акцыі Лябедзька да яго і Статкевіча не звяртаўся.
«Мэта любой акцыі — гэта не прыгожыя лозунгі пра тое, што трэба быць разам. «Перспектыва» падняла хвалю, якая прывяла да абмеркавання норм указа № 222 аб прадпрымальніцкай дзейнасці, і «пасажыры» на акцыі нам не патрэбныя», — заявіў ён.
Дзеянні прадстаўнікоў АГП Шумчанка расцэньвае як спробу сарваць марш прадпрымальнікаў, бо з-за супадзення часу і месца двух мерапрыемстваў у Мінгарвыканкама фармальна з'яўляецца магчымасць адмовіць заяўнікам аднаго з іх. Гэту сітуацыю Шумчанка мае намер абмеркаваць са Статкевічам.
Варта адзначыць, што пасля падачы заяўкі на правядзенне 14 сакавіка маршу прадпрымальнікаў Шумчанка падкрэсліваў: мэта мерапрыемства — не палітычная, а эканамічная. Акцыя заклікана звярнуць увагу кіраўніка дзяржавы на неабходнасць як мага хутчэй вырашыць праблемы ІП, якія з-за ўказа № 222 і шэрагу іншых законаў не могуць легальна весці свой бізнес.
Цяпер чытаюць
«Мне хацелі кампенсаваць каля 10% ад кошту пагарэлага». Як беларускія прадаўцы на Вайлдберыз вырашаюць вогненныя праблемы7
«Мне хацелі кампенсаваць каля 10% ад кошту пагарэлага». Як беларускія прадаўцы на Вайлдберыз вырашаюць вогненныя праблемы
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было66
Каментары