Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч
У прапагандысцкіх каналах звярнулі ўвагу на гадзіннік Паўла Латушкі. Сцвярджаецца, што ў яго на руцэ гадзіннік Zenith за $13 тысяч. Але гэта, натуральна, хлусня — іншы брэнд, нават іншыя колеры.
Насамрэч на руцэ Латушкі гадзіннік французскай маркі Oxygen з кабрэндынгам Peugeot — такія рабіліся ў калекцыі ў стылі «Legend»/Sport Vintage.
На гэтым кварцавым гадзінніку тры малыя цыферблаты, яны паказваюць дзень тыдня, дату і 24‑гадзінную стрэлку.
Новыя такія Oxygen x Peugeot прадаваліся прыкладна за €150-190. На другасным рынку гадзіннікі прадаюцца за € 40‑100 у залежнасці ад стану і камплекта.
Гэта масавы кварцавы гадзіннік, калекцыйнай прэміі ў яго няма. У цяперашнім каталогу Peugeot гэтай мадэлі ўжо няма, засталася толькі іншая лінейка.
Як патлумачылі ў прэс-службе Паўла Латушкі, гэты гадзіннік падарылі палітыку ў Парыжы. У 2014 годзе ён у якасці пасла Беларусі ў Францыі ўдзельнічаў у падпісанні пагаднення аб зборцы аўтамабіляў «Пежо» на заводзе «Юнісон». Такую самую мадэль падарылі ўсім членам беларускай дэлегацыі.
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары