Чатыры ўнікальныя аперацыі Роса правялі ў Дзіцячым хірургічным цэнтры ФОТЫ
Чатыры звышскладаныя аперацыі былі праведзеныя 7 і 8 лютага ў РНПЦ дзіцячай хірургіі, паведамляе Міністэрста аховы здароўя.
Як распавёў дырэктар цэнтра Канстанцін Драздоўскі, былі запрошаныя дзеці з самымі складанымі паталогіямі, якія патрабуюць правядзення аперацыі Роса. Умяшанні прайшлі пры непасрэдным удзеле аднаго з самых вядомых і дасведчаных кардыяхірургаў свету, прафесара Аўксендзіёса Калангоса, прэзідэнта Фонду Калангоса (Швейцарыя).
«Гэта рэдкая аперацыя для нашай краіны. Менавіта таму мы запрасілі прафесара для навучання нашых супрацоўнікаў. Неабходна падняць у нас узровень хірургіі гэтага пароку», — сказаў Канстанцін Драздоўскі, дадаўшы, што падобныя парокі развіцця штогод сустракаюцца ў некалькіх беларускіх дзяцей.
Прафесар пагадзіўся правесці некалькі майстар-класаў, таму беларускія дзіцячыя кардыяхірургі падабралі самыя складаныя выпадкі, адзін з якіх апынуўся ўнікальным. Па словах прафесара, такая анатомія, з якой 7 лютага сутыкнуліся лекары, сустракаецца вельмі рэдка.
«У гэтай аперацыі рэдка, але сустракаецца крытычны момант, як гэта было, напрыклад, у аднаго з дзяцей. Калі перасекчы няправільна, будзе шмат ускладненняў, у тым ліку ішэмія. На шчасце, нам удалося правесці аператыўнае ўмяшанне без ускладненняў», — адзначыў Аўксендзіёс Калангос.
У сусветнай практыцы аперацыю Роса выконваюць радзей, чым перасадку сэрца. Яна вельмі складаная і патрабуе каласальнага вопыту хірургаў. «У Еўропе і ЗША ўсяго некалькі адмысловых цэнтраў, якія робяць аперацыі такой складанасці. Я вельмі рады, што мы з доктарам Драздоўскім пачынаем праграму па выкананні аперацый Роса ў Беларусі. Мяне ўразіла праца доктара Драздоўскага і яго калег», — сказаў прафесар.
«Мы працуем з праблемай паталогіі аартальнага клапана. Звычайна пры нараджэнні праводзім аперацыю, якая робіць крыху лягчэйшым жыццё маляняці, але істотна дапамагчы дзіцяці можа толькі аперацыя Роса. Яна праводзіцца толькі тады, калі з аартальным клапанам ужо больш нічога немагчыма зрабіць», — адзначыў Канстанцін Драздоўскі. Ён патлумачыў, што ў гэтым выпадку лёгачны клапан ушываецца замест аартальнага, а на месца лёгачнага ставіцца адмысловы біялагічны пратэз.
Аперацыі складаліся з некалькіх частак, дактарам даводзілася спыняць сэрца кожнага малога. У такіх умяшаннях прымае ўдзел каманда з 15 спецыялістаў. Поспех шмат у чым залежыць ад таго, як будуць праведзеныя анестэзія, штучны кровазварот, якім будзе выходжванне ў аддзяленні рэанімацыі.
Падобная аперацыя ў Беларусі выконвалася ў 11-месячнага дзіцяці, яе правялі каля 10 гадоў таму. Тады дапамогу аказалі амерыканскія калегі. Другая ў тэрміновым рэжыме была праведзена беларускаму дзіцяці ў канцы чэрвеня 2019 года. Сёння, дарэчы, стала вядома, што ў Мінск з Віцебска будзе дастаўленае яшчэ адно дзіця, якое мае тэрміновую патрэбу ў такой аперацыі. 9 лютага перад адлётам прафесар і каманда беларускіх кардыяхірургаў прааперуюць і яго.
Сёння адбылася сустрэча міністра аховы здароўя Уладзіміра Караніка з прафесарам Аўксендзіёсам Калангосам і Канстанцінам Драздоўскім.
Абмяркоўваліся пытанні далейшай супрацы, у тым ліку магчымасць правядзення серыі майстар-класаў для беларускіх дзіцячых кардыяхірургаў.
Таксама гаворка вялася пра правядзенне сумесных навуковых даследаванняў і публікацыі у галіне дзіцячай кардыяхірургіі.
Цяпер чытаюць
Малады работнік «Мінск-Арэны» павінен заплаціць 71 мільён даляраў9
Каментары