Палітзняволенага Дзмітрыя Фурманава, якога судзяць па справе Ціханоўскага, змясцілі ў карцар
Сёння пасля суда над Дзмітрыем Фурманавым, Уладзімірам Кнігам і Яўгенам Разнічэнкам стала вядома, што палітзняволенага Фурманава 9 сакавіка змясцілі ў карцар на пяць дзён. Як паведаміў ягоны бацька, нават сам Дзмітрый не ведае, што стала прычынай дысцыплінарнага спагнання. Па словах бацькі палітзняволенага, Дзмітрый у цэлым не скардзіцца на ўмовы ўтрымання ў гродзенскай турме, куды яго перавезлі з жодзінскага ізалятара перад судом, паведамляюць праваабаронцы.
У судзе Кастрычніцкага раёна Гродна 10 сакавіка прайшоў ужо як мінімум дзясяты працэс па гэтай справе, суд пачаўся 18 студзеня. На лаве падсудных знаходзяцца трое з дзесяці фігурантаў крымінальных спраў за тыя падзеі. Іх усіх абвінавачваюць у актыўным удзеле ў дзеяннях, якія груба парушаюць грамадскі парадак 29 траўня ў Гродне (ч.1 арт. 342 КК). Акрамя гэтага, Разнічэнку і Кнігу абвінавачваюць у гвалтоўных дзеяннях у дачыненні да міліцыянтаў (арт. 364 КК). Пацярпелымі па справе прызнаныя чатыры супрацоўнікі міліцыі. Сёння на судзе дапыталі чарговага сведку, аднаго з супрацоўнікаў АМАПа — Аляксандра Супруна, які нёс ахову грамадскага парадку ў цывільным адзенні на Савецкай плошчы 29 траўня, калі адбыўся інцыдэнт. Па словах абвінавачанага Уладзіміра Кнігі, які раней працаваў у гродзенскім АМАПе, па яго падліках з ведамасцяў, якія далучаны да матэрыялаў справы, 29 траўня на Савецкай плошчы ў Гродне для аховы грамадскага парадку былі задзейнічаныя 48 супрацоўнікаў міліцыі.
Паралельна ў судзе Ленінскага раёна Гродна судзяць палітзняволенага кіроўцу аўтадома «Страна для жизни» Аляксандра Арановіча. Там таксама ажыццяўляецца допыт сведак: супрацоўнікаў АМАПа, відавочцаў інцыдэнту на Савецкай плошчы і іншых. Сам Аляксандр адмовіўся ад дачы паказанняў.
Цяпер чытаюць
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было66
Каментары