МЗС Беларусі апублікавала поўную версію інтэрв'ю кіраўніка ведамства тэлеканалу Euronews, які, нагадаем, спыніў сваё вяшчанне ў Беларусі па рашэнні Мінінфарма, піша Tut.by.
Журналістка тэлеканала нагадала, што беларускія ўлады абвінавачваюць у шматлікіх і сістэматычных парушэннях правоў чалавека па выніках спрэчных прэзідэнцкіх выбараў у мінулым годзе. Яна таксама паведаміла, што была ў Мінску і сваімі вачыма бачыла жорсті гвалт у дачыненні да пратэстоўцаў. Карэспандэнтка Euronews запыталася ва Уладзіміра Макея, ці не шкадуюць беларускія ўлады аб сваіх дзеяннях.
— Уся праблема ў тым, што мы па-рознаму ацэньваем сітуацыю, якая адбылася ў Беларусі ў жніўні мінулага года. І сёння, на жаль, узаемныя абвінавачванні зайшлі так далёка, што мы не можам адыграць назад. Мы расцэньваем падзеі мінулага года з абсалютна іншага пункту гледжання.
Магчыма, улада часам дзейнічала празмернымі метадамі, але гэта была адэкватная рэакцыя на тыя абсалютна не мірныя акцыі пратэсту, гвалтоўныя акцыі пратэсту, якія мелі месца ў Беларусі.
Ён лічыць, што, «па сутнасці, была спроба дзяржаўнага перавароту».
Уладзімір Макей таксама заявіў, што цяпер у Беларусі «няма ніякіх пратэстаў, а людзі па «пратэсных справах» затрыманыя за канкрэтныя злачынствы».
— Што тычыцца тых асоб, якія былі затрыманыя ў свой час, павінен вас запэўніць, што яны былі затрыманыя за канкрэтныя злачынствы і правапарушэнні, і я не думаю, што ў краінах Еўрапейскага саюза гэтыя правапарушэнні і злачынствы ацэньваліся б інакш. Напрыклад, восем актаў тэрарызму, звязаныя з падпаламі будынкаў, падрывамі аўтамабіляў і гэтак далей. Дзесяць выпадкаў блакавання чыгуначных шляхоў. Велізарная колькасць выпадкаў блакавання транспартнага руху. Гэта ўсё мае палітычную падаплёку ці ўсё ж звязана з парушэннямі заканадаўства Рэспублікі Беларусь?
Ён таксама заявіў, што напады і пагрозы на адрас супрацоўнікаў органаў аховы правапарадку і іх членаў сем'яў падлягае крымінальнаму пакаранню і ў еўрапейскіх краінах.
Карэспандэнтка Euronews нагадала пра тое, што ў Беларусі 358 чалавек прызнаныя палітвязнямі (у цяперашні момант 360 чалавек), і пацікавілася, ці здзейснілі яны рэальныя злачынствы, прывёўшы ў прыклад асуджаных журналістак тэлеканала «Белсат» Кацярыну Андрэеву і Дар'ю Чульцову.
На гэта Уладзімір Макей адказаў, што не прадстаўляе судовую ўладу і Следчы камітэт.
— Таму казаць аб кожным канкрэтным выпадку я не магу, але мы можам вам выслаць адпаведную інфармацыю, якая пацвярджае парушэнне заканадаўства дадзенымі канкрэтнымі асобамі, у кожным канкрэтным выпадку.
У сваю чаргу, ён прывёў у прыклад Зянковіча, Аўтуховіча і Аліневіча, якія затрыманыя «за канкрэтныя спробы здзяйснення тэрарыстычных актаў, здзяйснення дзяржаўнага перавароту». Макей папракнуў заходнюю прэсу ў тым, што яна гэта сарамліва замоўчвае, а таксама пацікавіўся, чаму Захад не рэагуе на раскрыццё «справы аб дзяржперавароце».
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары