Кіраўнік Палтавы не можа трапіць у кабінет, бо пакрыўджаная папярэдніца знесла ключы
Панядзелак, вядома, дзень цяжкі. Асабліва ён такім аказаўся для новага сакратара Палтаўскай гарадской рады, які не змог патрапіць у свой працоўны кабінет.
Дэпутат прыйшоў на працу, але выявілася, што ключ ад кабінета ёсць толькі ў папярэдніцы сакратара, якую звольнілі ў пятніцу. Сама жанчына не згодная з гэтым рашэннем, таму ключ на вахту не здала.
Не змог дэпутат трапіць у кабінет нават пасля таго, як выклікаў паліцыю і следча-аператыўную групу. Загадчык гаспадарчай часткі рады адмаўляецца ламаць дзверы.
Давялося проста па аб’яве выклікаць майстра, які займаецца аварыйным адкрыццём дзвярэй.
Зараз у Палтаўскай гарадской радзе месца кіраўніка вакантнае. Гэта значыць, што фактычна абавязкі кіраўніка горада выконвае сакратар.