«Рэал» ужо летам хоча купіць нарвежца Холанда
Фота з інстаграма «Барусіі»
Іспанскі футбольны клуб «Рэал» Мадрыд мае намер набыць нарвежскага форварда германскай «Барусіі» (Дортмунд) Эрлінга Холанда.
Мадрыдскі клуб можа скарыстацца пунктам у дамове «Барусіі» з 19-гадовым футбалістам, згодна з якім яго кантракт можа быць выкуплены за € 65 млн.
Холанд перайшоў у «Барусію» з аўстрыйскага «Зальцбурга» у студзені, падпісаўшы кантракт да лета 2024 года. Паводле звестак партала Transfermarkt, нямецкі клуб заплаціў за нарвежскага нападніка € 20 млн. За восем матчаў, праведзеных у складзе «Барусіі» ва ўсіх турнірах, Холанд забіў 12 мячоў.
Нарвежац дзеліць першае месца з форвардам мюнхенскай «Баварыі» Робертам Левандоўскім у спісе найлепшых бамбардзіраў Лігі чэмпіёнаў гэтага сезона, на рахунку абодвух футбалістаў па 10 галоў. Пры гэтым Холанд стаў першым гульцом у гісторыі Лігі чэмпіёнаў, які гуляў і забіваў за дзве розныя каманды ў адным розыгрышы турніру (за «Зальцбург» ён вызначыўся восем разоў, за «Барусію» — двойчы).