Праз тыдзень – «Белая Вежа»
Найбуйнейшы беларускі тэатральны форум пройдзе ў Брэсце ў 14 раз.
На наступным тыдні ў Брэсце распачнецца Міжнародны фестываль «Белая Вежа». Найбуйнейшы беларускі тэатральны форум пройдзе 5‑12 верасня, у 14 раз.
Сёлета фестываль – прысвечаны 200‑годдзю Мікалая Гогаля. Таму конкурсная частка будзе прадстаўлена найперш драматургіяй гэтага класіка, а таксама айчыннымі і сусветнымі аўтарамі. Арганізатары абяцаюць, што будзе «саундрама па творах Гогаля, камедыя, драматычная балада, дэтэктыў‑шоў, інтэргальны стрыптыз, сучасная харэаграфія і калаж мініяцюр, лялечныя і музычныя спектаклі для дзяцей, вулічныя пастаноўкі».
У фестывалі запланаваны ўдзел 28 тэатраў з 13 краін. Самыя экзатычныя Венесуэла, Бразілія, Нігерыя, Іран. Беларусь прадставяць дзевяць тэатральных калектываў.
Закончыцца «Белая Вежа» гала‑канцэртам з удзелам оперных выканаўцаў.