Украіна спрабавала ўдарыць па расійскім касмадроме Плясецк
Кіраўнік карпарацыі «Раскосмас» Дзмітрый Баканаў падчас сустрэчы з прэзідэнтам Расіі заявіў, што падчас запуску спадарожнікаў шырокапалоснага інтэрнэту з касмадрома Плясецк у Архангельскай вобласці УСУ нібыта зрабілі спробу атакі беспілотнікамі.
Дзмітрый Баканаў і Уладзімір Пуцін. Фота: адміністрацыя прэзідэнта Расіі
«Калі кажуць, што космас па-за палітыкай, нашы «сябры» зрабілі ўсё, каб гэты пуск не адбыўся. У нас у гэты дзень былі спробы прылётаў сур’ёзныя па касмадроме, але тым не менш сумесныя баявыя разлікі прадпрыемстваў «Раскосмасу» і касмічных войскаў ажыццявілі зададзенае», — сказаў Пуціну кіраўнік дзяржкарпарацыі.
Гэтая падзея нібыта адбылася два тыдні таму, 23 сакавіка. Гаворка ідзе пра запуск першых 16 спадарожнікаў у межах праграмы стварэння расійскай нізкаарбітнай сістэмы сувязі. Яна павінна стаць аналагам глабальных спадарожнікавых інтэрнэт-сетак і забяспечыць хуткі доступ да інтэрнэту, у тым ліку ў аддаленых рэгіёнах.
Інфармацыя пра нібыта атаку ўкраінскіх беспілотнікаў на касмадром Плясецк агучаная толькі расійскім бокам і не мае незалежнага пацвярджэння.
Чытайце таксама:
Дэфіцыт сродкаў СПА ці абхадныя маршруты: чаму аб’екты ў Расіі пастаянна цярпяць ад удараў УСУ
Украіна паразіла расійскі фрэгат, з якога білі крылатымі ракетамі