Пуцін: У Лукашэнкі няма панікі праз вокрыкі Зяленскага

У інтэрв'ю прапагандысту Паўлу Зарубіну прэзідэнт Расіі Уладзімір Пуцін успомніў некалькі слоў і пра Лукашэнку, з якім сустракаўся ў сваёй рэзідэнцыі на Валдаі ў пятніцу і суботу. 

Фота: Alexander Kazakov Sputnik, Kremlin Pool Photo via AP

Па словах Пуціна, Лукашэнка гатовы ўсяляк падтрымліваць вырашэнне канфлікту ва Украіне мірнымі сродкамі, і Расія яму ўдзячная за намаганні ва ўкраінскім урэгуляванні і, у прыватнасці, за дапамогу ў абмене палоннымі:

«Як мы памятаем, у Мінску ж пачыналіся калісьці перамовы ў 2022 годзе. Потым, па прапанове ўкраінскага боку, мы перабраліся ў Стамбул. Але ў Мінску ж былі заключаныя пагадненні па ўрэгуляванні ўзаемаадносін паміж Кіевам і Данецкам [у 2015 годзе]».

Выказаўся Пуцін, падабраўшы даволі дзіўныя словы, і пра паводзіны Лукашэнкі ў святле ўльтыматуму, які нядаўна паставіў яму прэзідэнт Украіны Уладзімір Зяленскі і патрабаванне якога аб адключэнні расійскіх рэтранслятараў на беларуска-ўкраінскай мяжы было, як выглядае, выканана. 

Па словах Пуціна, вокрыкі з боку Зяленскага не выклікаюць у Лукашэнкі панікі. Ён, маўляў, падыходзіць да гэтага вельмі спакойна, ураўнаважана і ўзважана.

Каментары да артыкула