Ва Украіне сітуацыю з беларускім аўтобусам у Бранскай вобласці назвалі «свядомай правакацыяй расіян»
Расійская прапаганда актыўна распаўсюджвае паведамленні пра нібыта ўдар украінскага беспілотніка па беларускім аўтобусе на тэрыторыі Бранскай вобласці Расіі. Пры гэтым расійскі бок не прадставіў ніякіх доказаў у пацвярджэнне сваіх сцвярджэнняў і нават не апублікаваў фатаграфій з месца здарэння, адзначае ў сваёй заяве Цэнтр супрацьдзеяння дэзынфармацыі Рады нацыянальнай бяспекі і абароны Украіны.
Скрыншот з відэа
Цэнтр супрацьдзеяння дэзынфармацыі звяртае ўвагу, што гэтыя паведамленні пачалі шырока распаўсюджвацца прыкладна праз два тыдні пасля аналагічнай гісторыі пра нібыта атаку ўкраінскага беспілотніка на беларускі аўтобус з дзіцячай футбольнай камандай у той жа Бранскай вобласці. Адзначаецца, што тая інфармацыя была абвергнута Генеральным штабам Узброеных сіл Украіны і Службай бяспекі Украіны.
«Пашырэнне прапагандыстамі ўкідаў пра нібыта ўкраінскія атакі на цывільныя аўтобусы з Беларусі — гэта свядомая правакацыя расіян, якія вельмі хочуць уцягнуць Беларусь у вайну супраць Украіны. Беларускае грамадства не падтрымлівае дапамогу Расіі ў агрэсіі супраць Украіны», — сцвярджае ЦСД.
Таксама выказваецца меркаванне, што падобныя інцыдэнты могуць быць арганізаваныя самімі расійскімі спецслужбамі, паколькі менавіта Расія зацікаўленая ў выкарыстанні беларускай тэрыторыі ў ваенных мэтах.
Таксама адмыслова падкрэсліваецца, што Сілы абароны Украіны няўхільна выконваюць нормы міжнароднага гуманітарнага права і наносяць удары толькі па законных ваенных цэлях.
Чытайце таксама:
З’явілася ВІДЭА з аўтобусам, у які трапіў дрон пад Бранскам
Стала вядома, чый аўтобус пацярпеў ад дрона ў Бранскай вобласці