Стартап з беларускімі каранямі распрацаваў ШІ-інструмент для праграмавання
Стартап Perplexity, адным з заснавальнікаў якога з'яўляецца ўраджэнец Беларусі Дзяніс Ярац, распрацаваў новы інструмент на базе штучнага інтэлекту для праграмавання пад кодавай назвай Teammate, піша Office Life.
Здымак ілюстрацыйны. Фота: «Наша Ніва»
Паводле інфармацыі Business Insider, супрацоўнікі кампаніі выкарыстоўваюць гэты інструмент з мая 2026 года. Ён прызначаны для выканання складаных інжынерных задач, у тым ліку суправаджэння праектаў, пошуку памылак у кодзе і маніторынгу працы сэрвісаў. Яго таксама выкарыстоўвалі для выяўлення памылак ва ўнутраных сістэмах кампаніі.
Пакуль невядома, ці стане Teammate даступным для шырокага кола карыстальнікаў. Калі гэта адбудзецца, Perplexity выйдзе на рынак ШІ-інструментаў для праграмавання, дзе будзе канкурыраваць з Claude Code, Codex і Cursor.
Сёння Perplexity мае больш за 100 мільёнаў актыўных карыстальнікаў штомесяц, якія выкарыстоўваюць яе пошукавыя і агентныя інструменты, у тым ліку дзясяткі тысяч карпаратыўных кліентаў. Сярод іншых распрацовак кампаніі — ШІ-браўзер Comet і ШІ-агент Personal Computer.
Чытайце таксама:
Стартап з беларускімі каранямі заключыў здзелку з Microsoft на 750 мільёнаў даляраў
The New York Times падала ў суд на стартап, заснаваны беларусам
Заснаваны беларусам стартап збіраецца купіць Google Chrome за $34,5 млрд