У Кітаі 28 чалавек загінулі падчас пажару на абутковай фабрыцы

На паўднёвым усходзе Кітая, у правінцыі Фудзянь, адбыўся адзін з самых маштабных пажараў апошніх гадоў. Узгаранне ўзнікла 9 ліпеня на абутковай фабрыцы кампаніі Huiteng у горадзе Дзіньдзян і забрала жыцці 28 чалавек, паведамляе Associated Press.

Фота: Zheng Liang/Xinhua via AP

Паводле афіцыйных даных, у момант пажару ў пяціпавярховым будынку знаходзіліся 239 чалавек — 237 работнікаў і двое наведвальнікаў. Выратаваць удалося 213 чалавек. Двое пацярпелых памерлі ў бальніцы, а яшчэ 26 чалавек, якія спачатку лічыліся зніклымі без вестак, пазней былі знойдзеныя загінулымі.

Пажар пачаўся на першым паверсе будынка, дзе размяшчаліся вытворчы цэх і склад. Агню спрыяла вялікая колькасць лёгкаўзгаральных матэрыялаў, якія выкарыстоўваюцца пры вытворчасці абутку. Акрамя таго, на лесвічных пралётах захоўваліся матэрыялы для падэшваў, што значна ўскладніла працу пажарнікаў і запаволіла тушэнне.

Для ліквідацыі пажару былі накіраваны 183 ратавальнікі і 35 адзінак тэхнікі. Адкрытае гарэнне ўдалося патушыць прыкладна праз чатыры гадзіны, а ўсяго ў пошукава-выратавальнай аперацыі ўдзельнічалі больш за 500 чалавек.

Прычына пажару пакуль афіцыйна не ўстаноўленая. Уладальніка фабрыкі і іншых адказных асоб затрымалі, а рахункі кампаніі былі замарожаныя на час расследавання.

Старшыня КНР Сі Дзіньпін запатрабаваў зрабіць усё магчымае для выратавання людзей, як мага хутчэй высветліць прычыны трагедыі і прыцягнуць вінаватых да адказнасці.

Трагедыя зноў звярнула ўвагу на праблемы бяспекі працы ў Кітаі. Нягледзячы на ўзмацненне кантролю, вытворчыя аварыі там працягваюць адбывацца. Паводле афіцыйнай статыстыкі, у 2025 годзе ў краіне адбылося каля 20 тысяч няшчасных выпадкаў на вытворчасці, у якіх загінулі больш за 18 тысяч чалавек.

Каментары да артыкула