U Šviejcaryi pabudujuć draŭlany chmaračos — samy vysoki draŭlany žyły dom u śviecie FOTA
Draŭlanyja chmaračosy — novy trend, jaki ciapier užo pierajšoŭ i na śfieru žyłych damoŭ. Dokaz — unikalny prajekt, jaki zusim chutka pačnuć realizoŭvać u šviejcarskim horadzie Vintertur, što znachodzicca niedaloka ad Ciurycha.
Usie fota: Aesthetica Studio/Schmidt Hammer Lassen Architects
Kompleks pad nazvaj Rocket & Tigerli, jaki pabudujuć u Vintertury, budzie składacca z čatyroch budynkaŭ, pryčym vyšynia adnaho ź ich składzie sto mietraŭ, piša CNN.
Dreva stanie nie adzinym materyjałam, jaki vykarystajuć dla budaŭnictva — naprykład, fasad kompleksu budzie pakryty ciomna-čyrvonymi i žoŭtymi terakotavymi cahlinami z šera-zialonymi detalami. Heta dapamoža ŭpisać budynak u navakolnuju prastoru, kab jon lepš spałučaŭsia z čyrvonymi dachami i žoŭtaj cehłaj budynkaŭ pa susiedstvie.
Akramia žyłych pamiaškańniaŭ, u novych budynkach płanujuć raźmiaścić handlovyja kropki, bar i hatel. Architektary pasprabavali zrabić damy jak maha bolš sučasnymi pa styli i praduhledzieli vialikija vokny, jakija zabiaśpiečać u pamiaškańniach maksimum soniečnaha śviatła. Stvaralniki kompleksu nazyvajuć jaho vialikim prajektam, jaki značna paŭpłyvaje na žyćcio ŭ rajonie jak u sacyjalnym, tak i ŭ estetyčnym płanie.
Mierkavana, pieršych žycharoŭ kompleks prymie ŭ 2026 hodzie.
Dackaja kampanija Schmidt Hammer Lassen Architects, jakaja sprajektavała damy, nazyvaje kanstrukcyju kompleksu inavacyjnaj i razhladaje jaje jak adzin z prykładaŭ taho, jak dreva moža być vykarystanaje ŭ jakaści alternatyvy bietonnamu karkasu budynka. Heta dazvolić zrabić pabudovu vysokich damoŭ bolš ekałahičnaj.